Ibra neitu AC Milan

Zlatan Ibrahimovic awmna AC Milan chuan zanin dar 11:25 hian Sparta Prague an mikhual dawn, mipui hmuh chak chu tun hnaia khel ṭha tak Ibra a ni dawn a, goal a khung leh ngei pawh a rinawm.

Kum 39 mi Ibra-himovic hian season duhawm a hmang mek, inelna hrang hrangah match nga a khelh aṭangin goal ruk a khung leh tawh. Milan striker palian hi Czech club tana dan harsa leh hnawksak tur a ni ang.

Milan coach Stefano Pioli-a'n a striker duhlai hi match ṭhenkhatah chuan hahchawlhtir a ngaih thu a sawi a, mahse Ibra hi inkhelh reng duh mi a nih avangin inkhel pawimawhah chuan a inlan zel a rinawm.

Serie A hmahruaitu hian coronavirus vangin keeper Gianluigi Donna-rumma leh Jens Petter Hauge te an chhawr thei dawn lo a, hliam nei Ante Rebic, Mateo Musacchio leh Matteo Gabbia te an la dam lo bawk.