Maradona a inkhung hrang

Diego Maradona chu Covid-19 a hlauh avangin a inkhung hrang mek, amah vengtu pakhat chuan hripui kai natna ang a nei niin a sawi a, coronavirus a kai tih pawh finfiah a nih hmain Maradona hian a him theih nan hma a la nghal.

Kar hmasa lawka kum 60 tling hlim Maradona hi tun hma pawhin a hriselna a ṭhat tawk loh avangin enkawl a ngai fo tawh a, tun dinhmuna a fimkhur viau pawh hi a mak hran lo.

Maradona hian 1986 World Cup khan an ram Argentina chu hlawhtlinna a chanpui a, a hnu lamah world champion an la ni leh lo. Inkhelh a chawlhsan hnuah team enkawl hna a thawk a, beisei angin a hlawhtling viau lo thung.

Tun dinhmunah Maradona hian an rama first division club Gimnasia Esgrima La Plata a enkawl mek, tun Zirtawpni hian Patronato an hmachhawn dawn a ni.

Argentinian Cham-pionship hi kumin March thla aṭang khan hri leng vangin an chawl a, tun kar hian an khel chhunzawm leh chauh dawn. River Plate coach Marcelo Gallardo pawh hri kai nen an inhnimhnaih vangin khung hran mek a ni bawk.

Argentina ramah hian mihring maktaduai 44 vel an awm a, maktaduai khat chuangin hri an kai - an zinga 29,000 zetin an thihpui tawh avangin khawvel huap pawhin hripui kai tuar na pawl tak an ni.