Atalanta lakah Juventus an mualpho

Serie A pathumna nih inchuh team pahnih inkhelah Atalanta chuan Juventus chu 4-0 in an sawp a, mualneitu Old Lady tan chuan chak loh satliah a ni lo, mualphona nasa tak a tling.

Inkhelh hmain Juve manager Thiago Motta chuan a sang thei anga bera Serie A season hman zawh an tum tih a sawi a, mahse mikhual team lamin Mateo Retegui, Marten de Roon, Davide Zappacosta leh Ademola Lookman te hmangin goal an khung.

Allianz Stadium-ah mikhual Atalanta lamin kawng tinrengin inkhel an thunun a, inkhel entu tlem zawk chu Atalanta ṭantu ni mah se an bengchheng zawk a, hamrik hnuhnung a rik hmain Juve ṭantute chuan stadium an chhuahsan nasa hle a ni.

Old Lady manager Motta chuan, "Kan khingpuite lakah khan tihsual neih a pawi tih kan hre lawk sa vek, mahse chutiang thil thlen hlau lo ang mai chuan kan khel a, kan tuar nasa ta a ni.

"Goal hmasa ber kha penalty aṭanga lut a ni a, inhnial theih tak tur a ni ang. Second half chhunga goal thum tehmeuh mai kan chhuah erawh keimahni lam thiam loh a ni thung.

"Kan tan chuan Serie A nomawi sawi rik chi a ni lo. Fiorentina nen kan inkhel leh nghal mai dawn a, chumi atan chuan thawhhona ṭha kan mamawh dawn a ni," tiin a sawi.

Juventus hian Serie A match 28 an khelh tawhah point 52 hmuin palina an ni mek, pathumna Atalanta chuan point 58 an hmu ta thung; hmahruaitu nen an inkarah point kua ngawt a awm tawh avangin an tan beisei neih san a harsa tawh ang.

Atalanta manager Gian Piero Gasperini chuan, "Juventus hi a zawna match nga chak thei an ni tih kan hriatreng a ṭha ang, tunah a che fuh zawk ni mah ila hun rei lote chhungin boruak a danglam thei," tiin a la ṭawng fimkhur hle.

Pathianni zan inkhel dangah Napoli chuan Fiorentina chu 2-1 in an hneh thung a, striker palian Romelu Lukaku leh Giacomo Raspadori ten goal an khung a, mikhual tana Albert Gudmundsson goal khungin awmzia a nei phak lo.

Season tir lamah khan chuan Antonio Conte-a'n a team Napoli chuan insiamrem tura hun an mamawh rei thu a sawi a, season tawp lam an thlen meuh chuan Serie A champion lai Inter Milan chhaih buai phak ber an ni mek.

Napoli manager Conte chuan, "Hnehna hlu tak a ni a, chutihrualin hun ṭha kan insiam tam dan ngaihtuah chuan kan pet goal tam tawk lo. Nipui laia player kan lak chawp dan te, thlasik laia kan chân leh tak si dante chhut chuan tuna kan thlen chin hi a mak a, a lawmawm bawk a ni," tiin a sawi.