Tottenham tan point khat

Goal hnih an chhuah hmasak hnuah Tottenham Hotspur chuan si phurh an sut zo a, an mikhual AFC Bournemouth nen 2-2 a inhnehtawkin point khat ve vein an insem.

Pathianni zan Tottenham Hotspur Stadium-a inkhelah Bournemouth hian Marcus Tavernier leh Evanilson te hmangin an khung hmasa a, hun tawp dawn lamah Spurs hian Pape Sarr leh substitute Son Heung-min te hmangin an sut.

Ange Postecoglou-a'n Europa League an khelh hmabak a ngaihtuah tel a ngai a, a player ṭha tam tak an la hliam bawk - captain Son ngei pawh inkhel bul ṭantu zingah a telh lo.

Mahse, goal an mamawh miau avangin South Korea international Son-a pawh dah luh a ngai, a tawpah harsa takin point an hlawh chhuak - Premier League aṭanga European football khelh beiseina erawh a bo teuh tawh hle.

Spurs manager Postecoglou chuan, "Kan inkhel kha ngun takin en ila, keimahni tihsual tam lutuk kha kan tuar. A bik takin first half-ah khan ball kan chan lai ngei pawhin kan ngaihtuah tawk lo.

"Bournemouth khan min beihna lai tur an zawng reng tih hre lo ang maiin kan ngaihsak lo, kan tuar ta reng bawk a ni. Kan khelh dan thlir chuan 2-0 a hnufual kha a mak lo, a lawmawm lai chu kan sut zo thei kha a ni thung," a ti.

North London club hian Ningani zanah AZ Alkmar an mikhual zui leh nghal dawn. Dutch club lakah hian 1-0 in an lo tlawm tawh a, Europa League quarterfinal lut tur chuan goal an khung ngei ngei a ngai a ni.