Tsitsipas a kal zel

Stefanos Tsitsipas chuan tun hnaiah nasa takin hma a sawn tih a takin a lantir chhunzawm, nimin zing khan Tsitsipas hian Matteo Berrettini chu 6-3, 6-3 a hnehin Indian Wells last 16 a inhlangkai.

Court-1 a inkhelah Tsitsipas hi a tir aṭangin a buai lo, a khingpui service vawi thum a chhuhsak laiin Berrettini hian break point pawh a hmu ve miah lo a, player pahnih an inthlau hle.

Hmanni lawka Dubai Open champion Tsitsipas chuan, "Match tin mai hian min entute tana hmuhnawm taka khelh chhuah hi ka tum ṭhin a, hnehna chan mai bakah hian hmasawn tumin ka khel ṭhin bawk," tiin a sawi.

Daniil Medvedev erawh a vannei thung - Russian tlangval hi Alex Michelsen nen minute 10 chauh an inkhel hman a, game hnih chu a la hman. Mahse, a khingpui Michelsen hi hliam vangin a inkhel chhunzawm thei ta lo.

Seeded pangana Medvedev hmabak erawh a awlsam dawn lo, American player Tommy Paul nen an intawng zui dawn a ni - Paul hian inkhel dangah Cameron Norrie chu 6-3,7-5 in a lo hneh ve thung.

California chhim lam aṭanga rawn chawr chhuak Marcos Giron chuan Alexei Popyrin chu 5-7, 6-3, 6-3 in a hneh a, a vawi khat nan fourth round a lut, kum 31 mi hi tualchhung miten an ṭan rawn nasa hle a ni.