Swiatek leh Rybakina tan hna awlsam

Indian Wells khelh mekah champion lai Iga Swiatek chuan Dayana Yastremska hnehin fourth round a invaw kai a, inkhel dangah Elena Rybakina pawhin a khingpui hnehin third round a paltlang ve bawk.

Polish nula Swiatek hi kuminah hian seeded pahnihna pek a ni a, champion tura rinkai a ni - nimin zing inkhelah Dayana Yastremska chu 6-0, 6-2 in a hneh, kuminah hian a champion leh thei a nih chuan hmeichhe player zingah Indian Wells title pathum la thei hmasa ber a ni ang.

Kum 23 mi Swiatek chuan, "Darkar khat leh minute nga chhung kan inkhel a, kan point en chuan awlsam taka chak angin ka lang a ni mai thei, mahse khatianga chak tur khan thapui ka thawh tih erawh ka sawi duh a ni.

"A tir aṭanga inkhel kan thunun a nih chuan a tawpah lawmna kan tawng ṭhin, tun hi final a la ni lo tih erawh ka hriat nawn a ngai," a ti. Season hmasa chawhnu lam aṭang khan Swiatek hia a che fuh rei thei lo a, tunah hian a insiamṭha mek.

Nikuma thla khat chhung hremna hmachhawntu Swiatek hian a match lehpekah chuan Karolina Muchova a tum leh ang, seeded 15-na Muchova hian inkhel dangah amah ang bawka Czech player Katerina Siniakova a lo hneh ve thung a ni.

Inkhel dangah 2023 champion Elena Rybakina chuan Katie Boulter chu 6-0, 7-5 in a hneh ve bawk. Season hmasa khan damlohna vangin Rybakina hi a inlan thei lo, kuminah chuan tun hma lama a hlawhtlinna ang kha neih let leh a tum ang.