ISL-ah goal sarih a lut

Pathianni zan ISL-ah inkhel pakhat a awm a, goal sarih a lut - beisei tur nei tawh lo Chennaiyin chuan 5-2 in Jamshedpur an sawp a, Khalid Jamil enkawl JFC pawh playoff khel tura tling chiang tawh an nih avangin an dinhmun a danglam phah lo.

JFC hian Rei Tachikawa hmangin goal hmahruai khung mah se, Chennaiyin lamin Daniel Chima Chukwu, Lukas Brambilla leh Irfan Yadwad hmangin an chhanglet a, 3-1 a ni.

Jamshedpur tan Mohammed Sanan chuan khung ve leh zuk mah se, awmzia erawh a nei phak lo a, Irfan Yadwad leh Daniel Chima ten goal khat ve ve an khung leh a, South Indian club hi 5-2 in chiang takin an chak.

Chennaiyin tan PC Laldinpuia chuan inkhel bul ṭanin, Jamshedpur tan C. Lalhriatpuia chu bench aṭangin a lut - Republic Veng rawlthar tan ISL-a a match hmasa ber a ni.

ISL-ah knockout round khel tur team panga a chiang tawh a, hmun pakhat chu Odisha leh Mumbai City-in an inchuh mek - zanin dar 7:30-ah Mumbai hian Bengaluru an lenchilh dawn.

Lallianzuala Chhangte telna Mumbai hian Bangalore club lakah point an hlawh chhuak a nih chuan playoff an khel ang a, an tlawm a nih chuan Odisha an lut thung dawn a ni.