Fan-ten sum thawk chhuak zel

Premier League fan-ten pay-per-view hmanga inkhel en man £14.95 (Rs. 1424) to lutuk an duh lohna chu a ṭha zawngin an lantir zel a, midangte ṭanpui nana fans lungawi lo sum thawhkhawm chu  £300,000 a tling tawh. 

Premier League match zawng zawng hi UK-ah television live a pekchhuah vek a ni ngai lo a, hei vang hian thuneitute chuan October thlaa league match, TV lama live a an pekchhuah lohte chu pay-per-view hmanga live a en theih turin an ti. 

Heng inkhel pekchhuah lohte hi fan-te chuan BT Sport Box Office emaw Sky Sports Box Office-ah £14.95 (Rs. 1424)-in an en thei a, ticket man hi fan-te chuan to lutuka ngaiin ticket man ai hi midang ṭanpui nan an thawh khawm ta zawk a ni. 

Newcastle United fan-te chu lungawi lohna lantir hmasa niin £60,000 chu NUFC Fans Food Bank group chuan an thawk chhuak tawh a, Liverpool fan-te chuan Sheffield United laka 2-1 a an chakna inkhel enna ticket man aiah £120,000 chu North Liverpool food bank tan an thawh khawm bawk. 

Leeds United fan-ten manto taka Aston Villa 3-0 a an sawp lai en aiin pawisa thawhkhawm an thlang a, £57,000 a tling. Tottenham Hotspur fan-ten pay-per-view match la nei lo mah se £16,000  an thawh khawm lawk tawh a, Arsenal fan-ten 1-0 a Leicester City an ngam loh khan £30,000 an thawh khawm. 

Manchester United leh Manchester City fan-ten £25,000 chu an khaw foodbank-ah an pe a, City hian pay-per-view match an la nei lo a, Hammers pawhin ppv an la nei lo chungin sum an thawh khawm tawh bawk.