Real Madrid-in point khat an sual chhuak

UEFA Champions League history-a club ropui ber Real Madrid-in Borussia Monchengladbach lakah point khat an hlawh chhuak hram. Mualneitu Gladbach-in Marcus Thuram goal hnih hmangin hun rei zawk hma an hruai a, Spanish club-in Karim Benzema leh Casemiro-te goal hmangin an sut hram.

Group B inkhel dangah Shakhtar Donetsk leh Inter Milan-te goal awm loin an inhnehtawk a, Ukrainian club-in point li hmuin hma an hruai. Zinedine Zidane-a enkawl Los Blancos erawh point khat hmuin table mawngphahah an awm.

Real Madrid a nih tawh chuan khawvel huapa player langsar hming a intlar thla ṭhin a, Cristiano Ronaldo awm loh hnuah erawh Karim Benzema leh Toni Kroos te chu player langsar an ni a, Sergio Ramos leh Luka Modric te kawl bawk mah se an kum zat thlirin an vanglai a pel tawhah a ngaih theih.

Los Blancos-in player an nei ṭha tawk lo tih khelmualah a lang a, kartawp  El Clasico-ah Barcelona hneh mah se Champions League match hmasa berah Shakhtar Donetsk an hneh lo. 

Borussia Park-ah hian an match hmasa thlir chuan an insiamṭha viau tih a lang a, Real Madrid goal nawr na mah se a hmawr an bawk fuh thei lo. French forward Marcus Thuram-a'n minute 33-na leh 58-naah Glabach tan a khung a, a hnampui Alassane Plea a inrawlh ve ve.

Gladbach hi an match hmasa berah Inter Milan nen an inhnehtawk a, an muala khel an nih bawk avangin chak turin an dinhmun a ṭha. Real Madrid chak lo thei dinhmunah an ding a, inkhel result hian Zidane-a hmalam hun thlengin a nghawng thei ang.

Real Madrid-in tun hma phak loin an dal deuh tawhah ngaih theih mah se sulhnu nei ṭha danglamna a lang. Zidane-a'n point hlawhchhuah tumin Luka Modric leh Eden Hazard te a luhtir a, Gladbach-in goal venhim hna an thawh tawh bawk avangin an nawr na lehzual.

Minute 87-naah Casemiro-a'n ball out tur chu tauh lut hman hramin Benzema-a'n nalh lutukin a vollley lut. Real-in BBC hming lem an pek zingah Gareth Bale leh Cristiano Ronaldo kawl lo mah se Benzema an la nei a, French striker hian beiseina a rawn siam.

Injury time minute thumnaah Modric-a cross chu captain Ramos-a'n tauh letin Casemiro-a'n siphurh sut nan a hmang. Hun tawp lama Real goal nawr a nat em avangin Gladbach tlarhnung dem theih a ni lo a, Zidane hoten point khat hlu tak an hlawh chhuak.

Real Madrid coach Zinédine Zidane chuan, "Inhnehtawkah hian kan lawm lo, lawm tur pawh kan ni lo. Amaherawhchu goal hnih kan chhuah hnua kan khelh dan khan kan rilru huaisenna a lantir a, chak duhna thinlung kan nei tih a lang bawk," tiin a sawi.

Point hlawhchhuahna tura player pawimawh Casemiro chuan, "Real Madird kan ni a, khawi hmunah pawh khel ila chak  kan tum ṭhin," tiin a sawi. Eden Hazard pawhin, "Point thum tlukin a hlu," tiin hun tawp lama an khelh dan chu a chhuan thu a sawi.

Gladbach coach Marco Rose chuan, "Ka naute an khel ṭha. Shakhtar kha chuan goal thumna an khung a, keini chuan kan khung lo. Chutichung chuan kan khelh danah ka lawm a, ka naute ka chhuang a, demna ka nei lo," tiin point thum hlawh chhuak lo mah se lawmna tur a hmuh thu a sawi.