Speed Kicking-ah gold medal la

Phillipine Taekwondo Association buatsaih, 2020 Smart/MVP Sports Foundation Global Taekwondo Online Speed Kicking Championship neih zawh takah Vanlalmawipuia chuan senior Lightweight-ah gold medal a dawng. Hmeichhe lamah Ruthi Lalneihhlui chuan India tan gold medal a pet chhuak ve bawk. 

Khawvel huap speed kicking inelna hi Covid-19 hrileng avanga inelna pangngai buatsaih theih a nih loh avanga mahni ram leh inlum aṭanga neih a ni.

Inelna hi minute thum chhung chawl loa pet dan chi hrang hrang leh hnek te rang taka chet kual pui a ni a. Technique har leh hmang dik, rang bawk si kha thlanchhuah an ni.

Venghnuai tlangval Mawipuia hi Mizoram aiawhin National inelnaah pawh vawi tam tak a lo chhuak tawh ṭhin a. Mizo te ngaihhlut Taekwondo Fight League season 3-ah khan fighter of the night-te pawh a lo ni tawh a, league puma Best fighter atan an lo thlang tawh bawk.

Hmeichhe inelna lama hlawhtling Ruthi hian senior female feather weight-ah khelin a elpui ram dangte te lakah pet rang ber a ni. India dinhmun chawikangtu gold medalist 19 zingah Vanlalmawipuia nen telin, a pumpuiah India team chu pahnihna an nihpui.

Tournament hi age group cadet, junior leh senior-a ṭhen a ni a, age group tin hian category 10 ṭheuh a nei bawk. India hian gold medal 19, silver medal 16 leh bronze medal 17 an la.