Falcao tel lohna Chelsea an chak lo
Premier League champion Chelsea-in season thar atana inpuahchahna inkhelh hmasa berah MLS club New York Red Bulls 4-2 in an hneh lo.
Inkhelh hma warm up-ah Radamel Falcao tel mah se Colombia striker hi field chhungah an la inlan lo. Chelsea-in first half-a Loic Remy goal khung hmanga an hmahruaina chu Red Bulls-in season half-ah Franklin Castellanos hmangin an sut a, Tyler Adams leh Sean Davis te goal hmangin 3-1 in hma an hruai zui bawk.
Nikum season Premier League player of the year Eden Hazard goal hmangin Chelsea-in an dinhmun siamṭha hret a, Red Bulls lamin Davis hmangin goal lina an khung a, Jose Mourinho hoten tih theih an nei lo.
Tehna a tling lo
Chelsea-in an rawlthar player-te inenchhina hunah an hmang a, International Champions Cup-a an match hmasa bera an chak lo hi hnualna tur a awm lo. US-a inelna neih mek hi friendly match a ni a, team ṭha tehna atan a tling tawk lo.
Goal khung naupang
New York Red Bulls goal hnihna tauh luttu Tyler Adams hi kum 16 chauha upa a ni a; school naupang chauh a la ni. Goal chhuahtu hi Chelsea-in pound maktaduai 8-a an lakluh Asmir Begovic a ni.
First half-a Chelsea keeper Thibaut Courtois-a'n tihsual vawi khat a nei a, vannei takin goal a chhuah lo. Stoke City keeper hlui Begovic erawhin captain John Terry backpass a clear hman loh vangin goal a chhuah a, goal thum dang a chhuah leh bawk.
Mourinho thukhawchang
Portuguese keeper chuan inkhelh banah a keeper-te a chhan a ngai a, Mourinho chuan, "Goalkeeper an chauh lutuk chuan an chevel a dik thei lo a, an che rang tawk lo. Courtouis-in first half-ah a tisual a, second half-ah Begovic a rang tawk lo. Friendly match-a an chet ṭhat tawk loh hi ka tan a pawi lo, keeper ṭha tak a ni tih ka hria a, chu chu a tawk. PSG kan khelh hunah Begovic hi starting eleven-ah ka dah ang," tiin a sawi.
Team chungchang sawiin Chelsea boss chuan, "Tunah hian England-a team ṭha ber manager-in hmachhawn mek a, ka sawi duh chu 'kan chak loh vangin kan team hi kan derthawng lo' tih hi a ni. Ni ruk liamta khan training kan ṭan a, training session vawi 11 kan nei tawh. Ka player neihte hi an ṭhat avangin ka ring tawk. Red Bull hi vawi 10 kan khelh pui tawh a, vawi kua kan chak. Second half khel ṭha lo mah ila hlauhthawhna tur ka nei lo," tiin a ṭawng pawr hle.