India hockey coach ban mak ti lotu Brasa
Hockey India Federation-in Thawhṭanni khan mipa team chief coach Paul van Ass chu thla nga lek an chhawr hnuah an ban a, India coach hlui Jose Brasa chuan mak a ti lo.
Spanish coach Brasa chuan, "India ramah chuan hockey coach hi thil hre tak anga ngaih an ni lo. Hockey India leh Sports Authority of India (SAI) te hian hockey coach hi inkhualtelemna ang lekah an hmang a, an duh duhin an thlak danglam a ni. Paul van Ass hi coach ṭha tak a ni a, thuneitute hian la let se ka duh a ni," tiin India rama hockey kalhmang dik loh zia a sawi chhuak.
Brasa chuan sawi chhunzawmin, "Hockey India hian an thuawih thei coach lakluh an duh. Amaherawhchu Ass-a chhuah takah chuan coach rilru put hmang dik leh fing chu lakluh a harsa ang," tiin a sawi.
Kum 64-a upa Brasa hian Ukraine hmeichhe hockey team a enkawl mek a, India team hi May 2009 khan enkawl ṭanin 2010 Asian Games thleng khan a kaihruai a, India ramin coach nghet an neih theih loh chhan a hre chiang.
Tun thlatir khan FIH Hockey World League Semifinals khelh zawhah India chu palina an ni a, hemi zawh hian Dutch coach Paul Van Ass chu ban a ni. FIH Hockey World League Final hi 5-13 December 2015 khian India-ah khelh a ni dawn.
Vawiin hian Olympian Harbinder Singh kaihruaina committee hnuaiah India coach tur an rel dawn a, coach ban tak Paul van Ass hming hi lamrik zingah a la tel tho.
Dutch coach chuan, "Ka hna hi ka bansan lo a, ka ban thu pawh ka sawi lo. Min ban ber chuan tih theih a awm lo. Tunah hian official takin banna ka la dawng lo a, chu chu ka nghak mek a ni. Amaherawhchu team enkawlna lamah Hockey India hruaitute an inrawlh dawn loh chuan India team enkawl zel hi ka duh a ni," tiin a sawi.