Manchester City an chak awlsam

Manchester City-in Thawhlehni zan khan Olympique Marseille 3-0 in an hneh a, Pep Guardiola hote Champions League match hnih khelh tawhah vawi hnih an chak. Group C inkhel dangah FC Porto-in Olympiakos 2-0 in an hneh ve bawk.

English club tan hian Ferran Torres, Ilkay Gundogan leh Raheem Sterling ten goal an khung a, Kevin de Bruyne pawhin bul ṭanin Belgian midfielder hi awlsam taka hnehna an chan theih nan a ṭangkai hle.

Pep Guardiola-a'n Sergio Aguero leh Gabriel Jesus te a chhawr theih loh avangin tlarhmaah Phil Foden, Ferran Torres leh Raheem Sterling te a tlar a, ṭum dang ang lo takin 'false nine' an awm lo.

Spanish winger Torres hi Marseille centre back bulah dah a ni a, a tlan chakna hmanga hmunruak awl lai zawng tura tih a ni. Ṭum dangah chuan Man City hi defence laiah player panga an dah avangin an buai ṭhin a, tun ṭumah erawh Marseille-in defence panga an chhawr chungin an buai phah lo.

Midfield ṭha mi De Bruyne-a'n hmun pawimawh a chang a, Torres goal hmahruai leh Sterling-a chak nemnghehna goal te hi a siamsak. Belgian midfielder hian September 2015-a Man City a zawm aṭangin inelna hrang hrangah assist vawi 88 a nei ta. Spanish forward Torres hi kum 20 leh ni 241 mi a ni a, Spanish player zinga Champions League match thum a zawna goal khung thei naupang ber a ni. 

Manchester City boss Pep Guardiola chuan , "Tun lai khawvelah chuan chesual hlek ila, social media-ah a chhe thei ang berin min chhuah ṭhin. A pawimawh chu khelmual chhehvela kan chanchin an sawina ngaihtuah lo a, kan tih tur chin hriat chian hi a ni," tiin a sawi a, an khelh dana a lungawi thu a sawi lang bawk.

Marseille coach Andre Villas-Boas chuan, "City-in na takin min nawr a, kan tan a harsa a ni. Kan tihsual kan tuar a, goal hnih kan chhuah chiah khan kan tan thawhchhuah ngaihna a awm ta lo," tiin a sawi.