Firmino-a'n ngaihven a hlawh
Nilaini khan Liverpool player thar Roberto Firmino chuan Melwood-ah training a ṭan.
Kopites (Liverpool supporter-te kohna) ten an striker thar Christian Benteke (£32.5m) aiin pound maktaduai 29 man Brazilian midfielder hi tun dinhmunah chuan an ngaihven zawk.
Youtube (internet kaltlanga video enna) chhiar tel loin Liverpool supporter 95% vel hian season thara jersey no. 11 ha tur Firmino hi an la hmu lo. England lamah media an chak avangin Benteke chungchanga an hriat tur zawng zawng chu an hre vek tawh a, kar tinin a inkhel lai hmuh tur a awm tawh bawk. Hei vang hian hriat chian loh Brazilian star Kum 23-a upa Firmino inkhelh hlan hi an nghakhlel hle.
Hoffenheim midfielder hlui hian Copa America a khelh vangin tour-naah a tel ve lo. Firmino hian Hoffenheim tan season hnih chhungin goal 32 a khung a, league-ah pakuana leh pariatna a nih pui. Liverpool-ah Firmino hi Luis Suarez angin a ropui thei a, Alberto Aquilani angin a hlawhchham thei bawk.
Liverpool player ropui Jamie Carragher chuan, "Brazil aṭangin a rawn kal a, Luis Suarez nen an khelh dan a inang a, Hoffenheim tan a khelṭha tih kan hre tawh. Liverpool ṭantute chuan kan club tana a khelh dan tur hi kan hre châk tawh a ni," tiin a sawi.