Arsene Wenger-a'n chawlh a la tum lo

Arsenal boss Arsene Wen­ger chuan chawlh ala tum hnaih loh thu leh second nga aia rei chawl tura ala inngaihtuah ngai loh thu a sawi.

French manager fing tak hian nakkum hian North Lon­don club Arsenal hi kum 20 a kaihruai tling tawh dawn a; mahse Manchester United manager ropui Sir Alex Fergu­son-a anga khelmual chhuahsan mai ala tum lo hle.

Kum 65-a upa Wenger chuan, "Chawlh maw..? Second nga aia rei ka la ngaihtuah chhin ngai lo, a chhan chu 'chawlh' tih hian min ti lungngai zawk ṭhin," tiin a sawi. A kum a tam ve ṭan deuh avanga chawlh tum hnai tura mi tam takin an rinna chu a dik lo tih a ti lang.

Kum 19 chhungin Wenger hian inelna hrang hrangah Arsenal hi match 1,502 kai­hruai tawhin vawi 814 hneh­na a chanpui a; vawi 356 tlawm­puiin vawi 332 chu an khingpuite nen an inhnehtawk thung.

Premier League-a a elpui ber ṭhin Sir Alex chungchang sawi chhunzawmin Wenger chuan, "Sir Alex kha chu mi bik leh danglam a ni. Old Trafford-a inkhel tura kan kal te hian kei chuan 'i lungleng ṭhin em?' tia ka zawh hian ani chuan 'Leng hran lo e, a tawk tawh a lawm' tiin min chhang mai ṭhin. Ani chuan football bakah sakawr intlansiak a ngaihtuah tel avangin kan inang tawh lo a ni," tiin kum 73-a upa Scottish manager chawlta chungchang a sawi.

Wenger leh Sir Alex hi kum riatin an in thlau a; Premier League manager langsar ber pahnih niin kum 17 chhung zet chu an lo inel tawh ṭhin. Kum 2013 khan Sir Alex hian kum 27 chhung zet a lo cham tawhna Old Trafford chu a lo mangṭha tawh a ni.

Kum 1966 khan Wenger hian Japanese club Nagoya Grampus aṭangin Gunners hi a zawm a, manager langsar tak a nih sa loh avangin English mipui tam takin a chungah rinna an nghat ngam lo. Wenger-a chu tunge? tih chu media ho chaw tui leh Arsenal fan-te an deusawhna ṭawngkam lar tak a ni.

Mahse, Gunners hian an ti sual lo. Kum 1997 - 08 season khan a club thar chu Premier League leh FA Cup-ah champion puiin tunge a nih tih chu thiltih hmangin a chhang let.

A hnathawh tam tak zingah kum 2003 - 04 season-a 'Invin­cible Team' a din kha a langsar pawl a ni. Hemi kum hian hneh loh nei loin League-ah an champion. Kum kaw chhung zet eng inelnaah mah an champion loh hnuah 2013 - 14 khan FA Cup an chawi leh a, nikum khan a vawi ruk nan chawi chhun­zawmin champion hnem ber an ni.

Tun hmaa i phurna ang kha ila nei em tia an zawhna chu chhangin Wenger chuan, "Tunhma zawng aiin tunah hian ka phurin ka rilru ka pe nasa zawk. Kan thil loh tih hnem tawh aṭanga inteh hi a fuh ber lo a, eng tiang chiaha ṭhain nge kan tih tih leh kan ngaih pawimawh dan hi a pawimawh zawk," a ti.

French manager mahni thu­duh ve tak chuan sawi chhun­zawmin "Football-ah chuan nitin hian thil thar a rawn thleng zela, kan hun kal tawh ai chuan a lo la thleng tur atana inbuatsaih hi ka ngai pawimawh zawk," tiin a sawi bawk.

North London club hi sea­son thar inbuatsaih nan Asia-ah an zin a; Singapore-ah Barclays Asia Cup khelin final-ah Premier League club Everton 3-1 a hnehin an champion nghe nghe.

Season hmasa a hliam vanga an chhawr mumal theih loh English player pahnih Jack Wilshere leh Theo Walcott te an dam ṭhat bakah Chelsea aṭangin goalkeeper Petr Cech an lakluh avangin champion beiseina an nei lian hle.

Kum 2003 khan Borussia Dortmund aṭangin goalkeeper Jens Lehmann an la lut a; Premier League-ah an champion zui nghe nghe. Hemi hnu hian League-ah an la champion leh lo.

Season thar thir lawkin Wen­ger chuan, "Season hma­sa khan match ruk kan khelh zawha Chelsea nen kan inthlauhna chu point 11 zet a ni tawh, khatiang chung chuan champion a harsa a ni. Champion tur chuan a bul ṭan ṭhat a ngai a, chu tur chuan kan inbuatsaih ngawrh hle," a ti.

Monaco manager hlui chuan sawi chhunzawmin , "Premier League-ah hian champion tum ngam team ruk vel kan awm avangin League dang zawng aiin a harsa ṭhin. Cech hi kum 33-a upa ni tawh mah se ṭha taka ala inkhelh theih avangin kan ṭangkai pui ang. Goal veng chunga game thunun thei a nih avangin kan mamawh tak chu a ni," tiin a player thar chu a dah pawimawh hle.