CONCACAF Gold Cup Champion lai United States an tla

Nilaini zan khan 2015 CONCACAF Gold Cup semifinal chu khelh zawh a ni ta; Atlanta, Georgia Dome hmuna inkhelah champion lai United States chu 2-1 a Jamaica hneh loin an tla.

Jamaica hi kum 1991 hnu lama Caribbean team zingah Gold Cup final lut leh hmasa ber an ni. Caribbean team hi Caribbean tuipui kam vela a thliarkar awm ho tihna a ni.

Manager Jurgen Klins­mann-a kaihhruai USA hi champion lai an nih vang leh tun tourna­ment-a an khelh ṭhat em avangin chak zawk tura rin sa an ni. Mahse, chutiangin thil a thleng lo. Darren Mattocks chuan minute 31-naah an hmahruaina goal tauh lutin Giles Barnes chuan mawi takin free kick a pet lut a, first half-ah Jamaica-in si hnih faiin hma an hruai.

A vawi ruk nana Gold Cup final khelh tum US hian second half-ah Michael Bradley hmangin an goal khat phurh an sut. Tun tournament-a goal ruk khunga top scorer ni mek captain Clint Dempsey hmangin US hian goal dang kung leh tum teh mah se Jamaica goalkeeper Ryan Thompson a che sual duh lo.

Semifinal lehlamah Mexico chuan Andres Guardado penalty vawi hnih chhuih luh hmangin Panama 2-1 in an hneh a, a vawi li nan final an lut.

Inkhel ṭan aṭanga minute 24-na lekah Luis Tejeda hnawhchhuah a ni chungin Panama tan captain Roman Torres chuan minute 56-ah goal khungin an ram hma a hruai pui.

Mexico hian ball chang tam mah se player 10 a khel Panama an ṭang khawng tlat. An goal khat neih an hum tluan mai dawna a lan laiin Torres hand ball vangin Panama-in penalty an chawi a, Guardado-a'n goal-ah chantir zuiin minute 90-ah 1-1 a ni. Extra time khelh chhunzawm niin penalty aṭang bawkin Guardado chuan goal khung lehin an ram a chak pui.

An player pakhat hnawkchhuaka penalty vawi hnih pe tu American referee Mark Geiger lakah Panama an lawm lo hle. Inkhelh banah Panama player ten referee chu an chak loh chhanah ngaiin buaina an siam zui a, venhinma hnuaiah Geiger chu khelmual aṭanga hruai chhuah a ni.

Panama coach kum 59-a upa Hernan Dario Gomez chuan kum 34 chhung zet football-a hun a hman chhungin khatianga thutlukna dik lo kha ala hmuh ngai loh thu a sawi hial.

US leh Canada ten an inthlen ṭawm 2015 CONCACAF Gold Cup hi July 7 aṭanga khelh ṭan niin July 26 khian Mexico leh Jamaica ten Philadelphia-ah final an khel ang. Semifinal-a chak lo pahnih USA leh Panama ten July 25 khian Chester-ah Third Place match an khel bawk ang.