FIFA buaina Taskforce hruaitu tur Domenico Scala

FIFA Audit & Compliance Committee chairman Domenico Scala chu Thawhṭannia FIFA executive committee-in FIFA reform taskforce a din thara chairman turin ruat a ni.

Tun hnaia eiruk leh thamna thubuai vangin FIFA hi a hmingchhe hle a, a hmingchhiatnate thaibo a nih theih nan leh FIFA chhungkuaa eirukna bakah nakin zela FIFA chuan langtlang zawka ro a rel theih nan FIFA reform taskforce hi din niin kar sarih chhunga FIFA a zirchiannate thehlut ngei tura beisei an ni nghe nghe.

Scala hian a mawhphurhna thar a lak hma hian FIFA hnuaia khawmualpui confederation hruaitu pathum a hmu phawt a, titi puina a neih zingah hian Sepp Blatter do tu langsar zinga mi UEFA president Michel Platini pawh a tel a ni.

Hetihlai hian FIFA reform taskforce chu FIFA chhungkuaa mi ni lo se titu campaign group New FIFA erawh Scala ruat a nih chungchangah hian an lawm lo hle.

New FIFA hruaitu zinga mi Jaimie Fuller chuan, "Tuna FIFA kal dan hi chu a nuihzatthlak hle a, Scala hian a duh zawng chhui tur leh zirchiang turin zalenna famkim a nei ang tih te hi chu thil nuihzatthlak mai a ni. Blatter leh FIFA hi he zirchianna leh chhuichianna aṭanga an fihlim a nih ngat phei chuan dawt muhlum a ni ang," a ti.

May thlaa FIFA president inthlana Blatter hneh lotu Prince Ali Bin Al Hussein pawhin New FIFA ngaihdan hi ṭawmpuiin FIFA reform taskforce hruaitu chu FIFA chhungkuaa mi ni lo se a duhthu a sawi ve bawk.

FIFA reform taskforce-ah hian chairman tiamin member 11 an awm dawn a ni.