Bayern leh Atletico an chak

UEFA Champions League group A inkhelah champion lai Bayern Munich leh Atletico Madrid ten an khingpui Lokomotiv Moscow leh RB Salzburg an hneh 

ve ve.

Lokomotiv Stadium-ah Bavarians-in minute 13-na lekah Leon Goretzka hmangin hma an hruai a, German champion hian an hun ṭha an bawhpelh hnem avangin Lokomotiv Moscow-in minute 70-naah siphurh an sut. Hansi Flick-a hote point hnih hloh thei dinhmunah ding mah se Joshua Kimmich-a'n minute 79-naah ṭha zetin chakna goal a khung.

Inhliam hlauh vangin Flick-a'n halftime laiin goal hmahruai khungtu Goretzka leh Thomas Muller te a la chhuak a, hun tawp lamah hna a harsat phah. Bayern head coach Hansi Flick chuan, "Lokomotiv-in goal venhim hna bera an neih avangin a harsa a, chutihrualin hun harsaah Kimmich-a'n team tana a pawimawhna a pholang," tiin a sawi a, chak an phu thu a sawi tel bawk.

Estadio Wanda Metropolitano-ah Atletico Madrid tan hna a awlsam lo a, RB Salzburg nen an inhnehtawk hle. Spanish club hian Marcos Llorente hmangin minute 29-naah hmahruai mah se Salzburg-in Dominik Szoboszlai goal leh Felipe-a'n an lama a tihluh hmangin an lehthal.

Diego Simeone hote hian an match hmasa berah Bayern Munich an hneh tawh loh avangin chak ngei an mamawh a, Portuguese rawlthar Joao Felix-a'n a chhan chhuak. Luis Suarez kawppui Felix hian minute 52-naah siphurh a sut a, minute 85-naah chakna goal a khung.

Atletico chakpuitu Joao Felix chuan, "Salzburg-in fak an phu. Goal an nawr ngam a, second half ṭantirhah phei chuan hma an hruai hial. Kan talbuai hman a, a tawpah erawh hnehna kan chang hram," tiin a sawi.