Djokovic leh Serena dah sang
United States Tennis Association chuan Nilaini khan US Open chungchangah thu chhuah an siam a; Wimbledon champion pahnih Novak Djokovic leh Serena Williams te dah lansarh bik an nih tur thu an sawi.
August 31 aṭanga September 13 inkar khian Flushing, New York hmuna USTA Billie Jean King National Tennis Center-ah US Open hi khelh tur a ni ang. Grand Slam tournament hnuhnung berah hian mipa leh hmeichhe world number 1 Djokovic leh Williams te hi rokhawlhna vanga an inlan thei lo thut a nih loh chuan seeded pakhatna ve ve tur an ni dawn a ni.
US Open final vawi nga a khelh tawh aṭanga vawi khat chiah la champion Serbian thiampuipa Djokovic hian kuminah Australian Open leh Wimbledon a chawi tawh a, a pathum nan US Open a nghak mek.
He tournament-ah hian American chhuanvawr Williams hi champion lai a nih bakah vawi ruk ngawt hnehna a lo chan tawhna hmun a nih avangin hmeichhe zinga a sang ber a ni tur hi an thik in a rinawm lem lo.