Nipui chawlhah CYMA Football a awm dawn?

Mizoram 'World Cup' tia sawi ṭhin veng/khua inelna CYMA Football chu kuminah buatsaih tum a ni a, Mizoram Football Association leh Central YMA ten indawrna an neih zawhah inelna buatsaih dan tur a hriat theih ang.

Kum 1985 aṭanga khelh ṭan CYMA Football hian ngaihhlut a hlawh ṭhin a, inelna hnuhnung ber kum 2023-a neih a nih pawh khan team 145 an tel. Inelna hi Branch YMA inelna a ni ṭhin a, CYMA buatsaih a nih avangin a hnuaia Branch YMA-ten tel hram an tum ṭhin.

CYMA Football hian Mizoram football-in tun dinhmun a thlen theihna kawngah hmun pawimawh tak a chang a, he inelna aṭang hian player ṭhahnem takin hming an lo chher tawh. Chutihrualin MFA buatsaih All Mizoram Inter Village Football leh Aizawl DFA buatsaih NECS Cup leh LPS Cup-ah te player inlak a hluar a, inelna fair bera ngaih ṭhin CYMA Football pawh a dik famkim chuang lo.

Kuminah hian eng ang chiahin nge inelna hi an kalpui dawn tih hriat a la ni lo a, chutihrualin nikum kum tawp lama MFA-in BR Studio MFA Inter Village Futsal Tournament a buatsaih erawh player endik nana Voters ID hman a nih avangin veng/khua inelna dik taka chhal theih a ni.

MFA leh CYMA hian an duh phawt chuan veng/khua football thiam ber zawnna angin an kalpui thei a, chutihrualin club football anpui ang deuhin player lak kawngah an phal zau thei bawk. Hei erawh inelna buatsaihtute duh danah a innghat ang.