Russia-ah vun rawng vanga inhmuhsitna a hluar Russian FA hi fiamthu ang chauh an ni - Frimpong
Arsenal midfielder hlui Emmanuel Frimpong chuan Russian Football Union chu fiamthu ang mai nia a hriat thu a sawi.
Russian Premier League club FC Ufa tana khel mek Frimpong hian kar hmasa khan a club leh Spartak Moscow an inkhelh ṭumin vun rawng vanga hmuhsitna ṭawngkam tawngin Spartak fan-te hi chhangletin a kut zunglai a hmuh a, hetianga a chet avang hian red card hmuin match hnih khel thei lo tura hrem a ni.
Hetihlai hian RFU erawh chuan Spartak Moscow an hrem loh tur thu an sawi a, Frimpong-a'n a sawi ang hian vun rawng vanga inhmuhsitna thil a thlen an hriat loh thu an sawi a ni.
RFU thutlukna hi Frimpong chuan ngaithiamloin, "Russian FA-in vun rawng vanga inhmuhsitna engmah thleng lo anga an sawi hi chu nuihzatthlak mai a ni. Ka khawsak dan vanga match hnih hrem ka ni hi ka pawm thlap a, ka chunga thil thleng hmuh a ni lo erawh ka pawm thei lo a ni," a ti.
Kum 23-a upa Ghana midfielder chuan sawi chhunzawmin, "Ka sawi fo ṭhin chu England kha mihang tan chuan inkhelhna tura hmun duhthusam a ni. England-ah hian vun rawng vanga hmuhsitna a awm lo tawp chu ka ti bik lo a, mahse Russian ho khawsak ang hi chuan an khawsa ngai lo," a ti.
Season hmasa khan Dynamo Moscow Congolese defender Christopher Samba chu Frimpong-a dinhmun angah chiah bawk hian hrem a lo ni tawh; Zenit St Petersburg's Brazilian forward Hulk chuan Russian league-a match tinah vun rawng vanga inhmuhsitna a thlen reng thu a lo sawi tawh bawk a, inhmuhsit nana zawng anga hram khum leh referee hialin hmuhsitna ṭawngkam nena an ankhum tawh thu a sawi.
Kum 2018 World Cup thleng tur Russia hi an World Cup thlen danah thil dik lo a awm nia ngaiin Swiss court chuan FIFA a chhuichian phah mek a, vun rawng vanga inhmuhsitna thlen nasatna em em hmuna World Cup khelh a ni tur hi duh loin Manchester City midfielder Yaya Toure chuan mihang player zawng zawng chu World Cup 2018-a khel lo turin a lo sawm tawh bawk a ni.