Benteke-a'n Liverpool a zawm ta
Liverpool chuan Aston Villa aṭangin Christian Benteke an la lut ta a, Belgian striker man hi pound maktaduai 32.5 a ni. Benteke-a contract rei zawng hi ziahlan a ni lo a, Anfield lam chuan 'hun rei tak chhung atan' tih zawngin an ziak.
Reds hian nipui transfer inhawn rualin Benteke hi an hel nghal chat a, mahse Belgium international hi a contract neih laiah amah duhtu an awm chuan pound maktaduai 32.5 sen an inhuam a ngai ang tih a inziak. Hei aia tlawma hralh hi Villa-in an tum lo a, Liverpool-in heti zat em em lo deuha lei an duh thung.
Club pahnih an inrem theih loh avangin striker mamawh Liverpool chu tlawm zawkah an ṭang. Kar hmasa khan Villa pawisa phut zat pek an inhuam thu Birmingham khaw club hi an hrilh a, Nilaini khan tihfel ngaite tifelin Liverpool club chanchina player manto ber dawttu ni turin Manchester United pawhin an hel nia an sawi Benteke hi an la lut ta a ni.
Benteke a hlim
Villa tan vawi 101 a inlana goal 49 khungtu Benteke chuan, "He hmuna ka awm thei hi ka lawm takzet a ni. Anfield hi nomawi chawi turin ka pan a, ka teammate-te nena thil ropui tak ti turin ka lokal a ni," a ti.
Kum 2012-a Belgian club Genk aṭanga Villa Park pantu chuan sawi chhunzawmin, "Manager nen kan titi hnuah he hmun hi ka awmna tur a ni tih ka hre nghal thei a, a ruahmanna a telve hi ka châk a ni," tiin Brendan Rodgers vanga Liverpool pan a nih thu a sawi.
Mamawh chhanna Benteke?
Season hmasa ṭan dawnah Liverpool-in an striker chhuanvawr Luis Suarez chu pound maktaduai 75-in Barcelona lamah an hralh a, striker thar an lakluh pahnih Mario Balotelli leh Rickie Lambert ten league-ah goal thum chiah an khung a, Uruguayan srtiker Suarez an thlak zo lo hle.
Suarez nena inkawp fuh em em mai Daniel Sturridge chu inhliam vangin season hmasa tluanin a khel mumal lo a, tun season-ah pawh September thlaah bak inkhel a ṭan thei dawn lo. Hetiang boruak hnuaiah hian Benteke hi Liverpool mamawh chhanna a ni thei ang em? tih chu zawhna awm a ni ta.
Liverpool hian Benteke hma hian tlarhma lama khel thei tur Burnley striker Danny Ings leh Brazil international Roberto Firmino te an la lut tawh bawk a, nikum lama an lei tawh loan-a Lille lama an kal tir Belgian striker Divock Origi a lo kir tawh bawk.
Liverpool style vs
Benteke style
Reds-in manto taka Belgian striker an la lut hi ṭhenkhat chuan an sawisel nasa a, a khelh dan leh Liverpool khelh dan chu inmil lo niin an sawi.
Premier League-a a match hnuhnung 12-a goal 12 khungtu Benteke hian ball kang a chang nasa a, Villa-a a khelh laiin a sir aṭanga ball cross a lo chang ṭhin. Liverpool erawh ball cross uar lo leh in pass kual nasa an ni a, hei tak hi Benteke a tan a harsa dawn niin ṭhenkhat chuan an ngai. Mahse, Liverpool striker hlui John Aldridge leh Villa-a Benteke enkawl ṭhintu Paul Lambert te ngaihdan erawh a dang thung.
Aston Villa-a Benteke hruai luttu Villa manager hlui Lambert chuan, "Benteke hi number 9 player dik tak a ni a, goal khung turin ball cross ringawt a mamawh lo. Amah thlawptu a neih ṭhat phawt chuan khawi aṭang pawhin goal a khung thei. Liverpool tana a khel thei tur hi ka lawmpui a, ama thawhchhuah liau liau a ni. Liverpool-a an beiseina tihlawhtling turin theihna a nei a, mahni inrintawkna a ngah em em a ni," a ti.
Liverpool striker ropui ṭhin John Aldridge chuan, "Benteke hi Liverpool khelh dana ṭha tawk lo tur anga an sawi hi thudik tawk lo a ni. Nikum FA Cup semifinal-ah khan a laiah khelin Liverpool a hnawtchhuak a, player che rang leh chak ṭha a ni a, Reds tan ṭha takin a khel chhuak thei ang," a ti.