Mario Balotelli a chhuak dawn em?

Liverpool-in Benteke an la lut tawh a, Fiorentina striker Mario Gomez nen sawi zawm mek an ni bawk. Hetiang boruak karah hian Italian striker Mario Balotelli chu an rama kir tura ngaih a ni.

Reds manager Bren­dan Rodgers chuan Balo­telli chungchang hi sawiin, "Balotelli chhuah dawn leh dawn loh hi ka sawi thei lo. Engkim hi ama kuta innghat a ni," a ti a, Italian striker hi a mamawh tawh lo niin a lang.

Tun nipui transfer-a player thar paruk lai la lut tawh Rodgers chuan sawi chhunzawmin, "Mario hi kan zinchhuahnaah lokal ve lo mah se player dangte nen rim takin training an nei mek. Fit turin theihtawp a chhuah mek a, season ṭan dawnah a dinhmun chu kan hria ang chu," a ti.

Italian striker hian pre-season tour neia zin­chhuak mek Liverpool squad pawh a zawm ve lo a, Jose Enrique leh Fabio Borini te nen Merseyside-ah training an nei mek.

Pound maktaduai 16-a Milan aṭanga Liverpool zawmtu Balotelli hian Anfield-ah beisei a phak lo hle a, vawi 28 a inlanah goal li chiah a khung. Khelmual chhunga a chet chhiat hi thuhran nise, a dan pangngaiin khelmual pawn lamah chanchin a nei ve reng.

December khan twitter lamah hnam leh hnam inkara inhuatna lam hawi thu a ziah avangin English FA chuan match khat khel thei lo turin an hrem tawh a, January thla khan Rodgers chuan Liverpool tana khel pha turin Balotelli chu a thawkrim tawk lo tiin a sawisel bawk.

February thla khan Europa League-a Besiktas nen an inkhelh ṭumin penalty pet a lo chuh tawh a, a hunlaia Liverpool captain Gerrard chuan a khelh loh vanga captain Jordan Henderson chu Balotelli chuan a zah tawk lo niin a lo sawisel tawh.

Kuminah pawh Balo­telli-a'n a zia a thlak lo, Reds fan-te huat rawn Raheem Sterling chu a club thar Manchester City tana goal a khung vangin a lawmpui thu twitter lamah a lo ziak hmanhmawh a, social media lamah Liverpool fan-te beih a tawk nasa hle.