Goa-in ISL2 final an thleng dawn

Indian Super League season hnihna final chu FC Goa khelmual Fatorda Stadium-ah khelh a ni dawn. ISL2 final hi December 20, 2015-a khelh tur a ni.

ISL tilartu Football Sports Development Ltd chairperson Nita Ambani chuan, "Goa-in football an nghaihhlut zia kan hriatin ISL 2015 final thlen hi an phu a ni. Indian Super League hian India ramah football hmel mawi zawka lantir a duh a, ramchhunga football-in ngaihven a hlawh theih nan theihtawp a chhuah a ni," tiin a sawi.

ISL2 opening match hi October 3 khian champion Atletico de Kolkata leh Chennaiyin FC ten Chennai-ah an khel ang a, league match-ah hian Mizoram Premier League ang thoin match 56 a awm.

ISL-ah hian match 56 khelh zawha team sang paliin double legged semifinal an khel a, MPL4 aṭangin ISL kalphung hi zawm a ni dawn.

ISL hmasa ber kha stadium-ah maktaduai 1.58 in an en a, khawvela football league en hlawh palina a ni phak. TV lam aṭangin maktaduai 429-in an en anga chhut a ni a, Star India-in ṭawng chi hrang pangain channel pariat kaltlangin India ram pumah a tichhuak a ni.