Djokovic-a'n Sampras dinhmun a hnaih

Novak Djokovic chuan Vienna Open khelh laia a match hmasa berah Filip Krajinovic a hneh a, ṭum ruk ngawt world number 1 ni chunga season khar thei Pete Sampras-a record tluk a tumna lamah kawng dik a zawh.

Thawhlehni zan inkhelah Djokovic hian amah ang bawka Serbian tlangval Krajinovic hi 7-6 (8/6), 6-3 in a hneh a, a match leh pekah Borna Coric a hneh a nih chuan world number 1 ni chungin tun season a khar dawn tih a chiang ang.

Kum 33 mi Djokovic hian tun hmain vawi nga - 2011, 2012, 2014, 2015 leh 2018 te khan a chung bera awm chungin season a khar tawh a, a elpui Roger Federer leh Rafael Nadal te nen an dinhmun a inang mek.

Kum 1993 aṭanga 1998 inkar khan Sampras-a'n vawi ruk ngawt hetiang dinhmun hi a lo luah tawh a, tunah chuan he record ropui tluk tur hian Novak tan match khat chauh chak a ngai tawh a ni.

Grand Slam vawi 17 champion tawh Djokovic chuan, "Krajinovic kha player ṭha tak a ni, a chak zawk ka ni hi vanneih vang chauh a ni. Chak leh chak lo min kar dantu kha a zim hle.

"Tun ṭumah hian ranking point hmuh belh duh vang ngawr ngawra inkhel anga min ngai tawk an awm mai thei, mahse kei chuan tournament pangngai dang nen ka en danglam chuang lo, nomawi chawi tuma inlan ka ni," a ti.

Vienna Open a khelh vangin Djokovic hian nomawi a kawl mekna Paris Masters a khel dawn lo; Paris khawpuiah hian a nomawi humhim pawh ni se ranking point a hmuh belh dawn lo, a neih sa a hum ringawt ang - Austrian khawpuiah erawh point hmuh belh theih a ni.

Kum 2007 daih tawh khan Vienna Open-ah hian Djokovic hi inlanin nomawi a chawi, hun rei tak hnuah a inlan ve leh chiah. French Open final-a Nadal a ngam loh hnuah hlawhtlin leh ngei a tum.

Austrian khawpuia inelna neihah hian player inlan an ṭha hlawm viau, world ranking sang zual 10 zinga paruk ngawt a tel. Djokovic bakah hian US Open champion leh khawtual tlangval ni bawk Dominic Thiem chu thleng sang tura ngaih an ni.