Barca tan Pedro dan theih a ni lo

Spanish midfielder Pedro Rodriguez-a'n Manchester United zawm a duh a nih chuan Barcelona-in tih theih an nei lo. Catalan club manager Luis Enrique chuan Pedro hi a release clause-a ngamtu an awm chuan dan theih dan an neih loh thu a sawi.

Barca manager Enri­que chuan, "Pedro chungchangah chuan player-in chhuah a duh a, a release clause ngamtu an awm bawk chuan kan dang thei lo. Hemi chungchangah hian Pedro hi ka hmu tawh a, a ngaihdan pawh tlang takin min hrilh. Kan inbiak dan chiah erawh sawi chhuah ka tum lo," tiin Pedro-a'n Barca chhuahsan chungchangah thuneihna a ngah thu a sawi.

Kum 27-a upa Pedro release clause hi tarlan danin pound maktaduai 22 chauh a ni a, player pali lakluh nana pound maktaduai 83.1 hmangtu Manchester United tan Spanish midfielder lak­chhuahna man zat hi tlin harsa a ni lo.

Amaherawhchu Uni­ted elpui Liverpool leh Chelsea-in Spanish midfielder hi an duh ve tho avangin Pedro hi duh thlang thei a ni. Barca-in tlarhmaah Lionel Messi, Neymar leh Luis Suarez te an neih avangin Pedro hian khelhna hmun chan tam theihna tur club zawm a duh a, a chhuah hi a rinawm zawk.

Barcelona midfielder Sergio Busquets pawhin a ṭhianpa nen an inbiak chungchang sawiin, "Ṭhian inbiakna a nih avangin sawi vek a rem lo. Pedro hian hun tam zawk field chhunga hman a duh a, keini chuan cham turin kan duh a, amaherawhchu thutlukna siam tur chu amah a ni," tiin a sawi.

United leh Barcelona hi Pathianni zan dar 1:20-ah International Champions Cup US-a khelh mekah an in hmachhawn dawn a, StarSports 4-ah tih­chhuah a ni ang. Pedro hian amah duhtu United a hmachhawn dawn a, an inkhel tur mipuiin an ngaihven theih nan tuna thuthang awm hi a pawimawh khawp ang.