Sterling-a'n goal a khung Balotelli a tawng chhuak

Thawhlehni zan khan Man­chester City leh AS Roma te International Champions Cup-ah an inkhel a, City goal hmahruai khungtu chu English player man to ber Raheem Sterling a ni.

Inkhelh ṭan aṭanga minute thumna lekah Sterling hian goal a khung a, City tlarhmaah hian David Silva leh rawlthar forward Kelechi Iheanacho te chu first hlaf-ah an rawn inkawp. Hun pangngaiah 2-2 in an inhnehtawk a, penalty-ah 5-4 in City an chak.

Roma-in Real Madrid leh Manchester City an inhnehtawk pui tawh a, Zirtawpni khian Real leh City hi an inkhel ve leh ang.

Kum 2013 khan Liverpool-in Melbourne Cricket Ground-ah friendly match an lo khel tawh a, mipui 95,000 rual pungkhawmin You'll never walk Alone tih hla nen Reds an lo lawm a, MCG chhung chu kawr senin a khat.

Thawhlehni zana Manches­ter City leh Roma inkhelah erawh mipui 41,134 chiah an pungkhawm.

Lawm hlawh lo Sterling

English winger Sterling-a'n Liverpool chhuahsan a duh luatah Anfield-a a hun tawp lamah Reds fan-te a chhaih kawlh a, Australia-ah pawh mipui lawm a hlawh lo hle. Melbourne Cricket Ground-a inkhelah hian inkhelh ṭan hma aṭangin Sterling-a'n au el tu a ngah a, stadium chhunga thawm lian ber pakhat chu Sterling auh elna a ni.

Mahse, Arsenal aṭanga Man­ches­ter City a pan vanga Arsenal fan-te ngaihdam theih loh Samir Nasri chuan Sterling hi a chhan tlat. French midfielder chuan, "Fans zingah pawh hian mawl tak tak an tam em em a ni. Arsenal ka chhuahsan khan hetiang bawk hian ngei ka lo hlawh tawh a, a pawimawh ber chu hmalam pana kal zel a ni," a ti.

Nasri chuan Sterling thla­vang hauh chhunzawmin, "Manchester City a lokal a thlang a, a thutlukna hi kan zahsak a ngai. Player naupang tak leh talent nei ṭha tak a ni. Ṭha taka a inkhelh hi phalsak ila, a thiamna hi nuam ti takin i thlir mai ang u," tiin Sterling chu hun pe turin fan-te a chah.

Balotelli a ṭawngchhuak

Liverpool-in QPR naupang Sterling an chher lian a, a ṭha chho ṭan chauh dawn tihin Anfield-a cham chhunzawm a duh lo. Reds fan-te'n phatsantuah ngaiin Sterling an hua a, chutih lai­in Liverpool striker Mario Balo­telli-a'n duhsakna a lo hlan!

Manchester City tan pawha lo khel tawh Balotelli hian Sterling-a'n City tana goal a khung zawh hnu lawkah twitter lamah, "Sterling i ti ṭha takzet e. Chhanna ṭha tak i pe a, hmasawn zel turin duhsakna ka hlan che," a ti.

Beisei phak lo Balotelli hian hetah a duhtawk mai lo, "Liverpool fan-te in ropui tih hi phat rual a ni lo......in thlawp fo ṭhin ang khan Sterling hi thlawp rawh u. He club tan hian a theihna zawng zawng a hlan ṭhin a, tuna kan en dan hian minti lunghnur hle. Liverpool chhungkaw zing ami ka la ni reng e," tiin a ziah belh.

Mahse, Liverpool fan-te'n an player huat em em ṭan zawnga Balotelli a ṭawng chhuak hi an ngaithiam lo a, twitter lamah ṭawngkam chhe tak tak hmangin an bei zui. Beisei phak lo leh buai lohna tura buai peih Balo­telli hi club dangah a chhuah dawn leh dawn loh a sawi theih ta loh.

Tute nge khel?

ROMA : De Sanctis; Florenzi, Manolas, Romagnoli, Torosidis; Ucan, Pjanic, De Rossi; Iturbe, Totti, Gervinho.

Scorers : Pjanic 8, Ljajic 87.

MAN CITY : Caballero (Hart 46); Sagna (Horsfield 46), Kompany (Evans 82), Mangala (Denayer 46), Clichy (Kolarov 46); Garcia (Lopes 46), Fernando (Nasri 46), Zuculini (Toure 46); Sterling (Navas 46), Kelechi (Unal 73), Silva (Barker 46).

Scorers : Sterling 3, Kelechi 51.