Falcao ka ni lo - Martinez

Thawhlehni khan Atletico Madrid striker thar Jackson Mar­tinez chuan Spain a thleng.

Atletico hian FC Porto a­ṭang­in pound maktaduai 25-in Colombia striker hi an la lut a, reporter leh fan ṭhahnem takin airport-ah hian an hmuak.

Kum 28-a upa Martinez chuan, "Falcao chu Falcao a ni a, Jackson chu Jackson a ni. Journalist pawh indanglam ang bawkin keini pawh kan inang lo a, khaikhin theih kan ni lo," tiin amah ang bawka Porto aṭanga Atletico zawmtu Rada­mel Falcoa nena khaikhin a duh loh thu a sawi.

Chelsea-in loan hmanga Mona­co aṭanga an lakluh Colombia striker Falcao hian Atletico tan match 68 khelin goal 52 a khung a, elpui huphurhawm tham a ni.

Falcao hian Porto tan season thum khelin league match 51-ah goal 41 a khung a, Martinez hian Porto tan season thum tho khelin league match 89-ah goal 67 a khung. Atletico striker thar hian an ram captain nena khaikhin hi duh lo mah se an khaikhin tho tho ang.

Atletico hian tun season-ah Arda Turan chu Barcelona lamah chhuah mah se a thlak turin Monaco aṭangin Yannick Ferreira Carrasco an la lut a. La Liga lam­ah chuan Real Madrid leh Bar­celona elpha ber tura ngaih an ni.