Tyson Fury vs Wladimir Klitschko Heavyweight boxer pahnih an incho

British heavyweight boxer Tyson Fury chuan boxing khawvel aṭanga Wladimir Klitschko paih­chhuah a duh thu sawiin, boxing ti hmuhnawm lo tu tiin Ukrainian boxer chu a sawisel.

Fury leh Wladimir te hi October 24-ah heavy­weight title inchuhin Germany khawpui pakhat Dusseldorf-ah an inhnek dawn a, mipui nghahhlelh a ni.

Kum 26-a upa Fury hian News Conference an neihnaah Wladimir chu tham lo takin, "Ka kekawrte ang chauha ngaihno beina leh ṭangkaina nei i ni - chumi awmzia chu eng tihna mah i ni lo tihna a ni. I hmai hnek sawp vek turin ka inpeih a ni," tiin a cho hle.

WBA, IBF leh WBO cham­pion Wladimir Klitschko hian kum 11 chhung chu hneh loh a tawng tawh lo a, a hneh loh hnuhnun ber Lamon Brewster niin kum 2004 daih tawh kha a ni.

Wladimir tan Fury nena an inhnek tur hi heavyweight title inchuha a vawi 28 inhnekna tur a ni a, hei aia tam heavyweight title fight hmachhawn thei an la awm lo. A vawi hnih nana World Champion a nih hnua a kawnghren kawl lai humhim tura a vawi 19 inhnekna a ni dawn bawk.

Vawi 24 a inhnek tawha tlawm hmel la hmu lo Fury chuan, "I kawnghren kawl lai zawng zawng kha chhuhsak che ka duh a, heavyweight division aṭang hian paih bo che ka duh a ni. I hnek dan leh inven dante hi mipui nin chi a ni a; Europe khawmualpui hian i chak lo lai hmuh an chak avangin khawvel hmaah ka tlawm dawn che a ni," tiin Wladimir hi a vau nasa hle.

Kum 39-a upa Wladi­mir Klitschko erawh a ṭawng pawr hran lo, Ukrai­nian boxer chuan, "He naupang hi hmuhnawm tak a ni. A zai a, a lam bawk a, mi ngainatawm tak a ni. Mi ṭhenkhat duhzawwng leh huat zawng tih hi nuam a ti em em a ni," tiin naupang chhia angah British boxer chu a ngai.