Tennis Australia-in Tomic an ngaichang

Australia rama tennis thuneitu sang Tennis Australia chuan Davis Cup khel tur an ram team aṭanga an paih tawh Bernard Tomic chu biak an duh thu leh an ngaihchan reng thu an sawi.

Kum 22-a upa Tomic hi a nungchang mawi lo tak avangin kar hmasa khan Miami Hotel-ah police-in an man. Wimbledon 2015 third round-a Novak Djokovic a hneh loh hnuah Tomic hian Tennis Australia chu amah ṭawiawm ṭha tawk loah a lo puh tawh bawk.

Heng thilthleng avang hian Tennis Australia chuan September thlaa Great Britain nen an khelh tur Davis Cup 2015 semifinal-ah Tomic hi a inlan theih nan inbiak pui an duh.

TA president Steve Healy chuan, "Tennis Australia chuan kan theihtawpin Tomic hi kan thlawp renga, aman a duh a nih phawt chuan Davis Cup squad-ah a rawn kir leh thei ang. " tiin Tomic lakah AT chu an inhawng hle.

Australia hian Davis Cup 2015 semifinal thleng turin Kazakhstan chu 3-2 in an hneh a, hetah hian Tomic a inlan lo thung.