India-in Davis Cup World Group play-off khel dawn

Thawhlehni khan Tennis Fede­ration (ITF) headquarters, London-ah ITF president Francesco Ricci Bitti chuan World Group playoff khel tur a puang a; India chuan Czech Republic a mikhual dawn. India hian hnehna an chang a nih chuan nakkum Davis Cup World Group an khel ang.

September 18-20 chhunga khelh tur World Group Playoff hi an khelhna hmun tur chu August thla khian tih chian tur a ni. A hmun atan hian All India Tennis Association chuan khawpui lian pahnih New Delhi emaw Pune emaw an thlang tura ngaih a ni. Cricket ngaihsanna ram, infiamna chi dangten hmun an chan meuh ngai lohna hmun India-in infiamna lamah a khaw hawi a thlak ve hret hret zel.

India hmabak hi a hautak dawn hle mai a, an hmachhawn tur Czech Republic hi seeded pakhatna an nih bakah kum 2012, 2013 leh 1980 khan an lo champion tawh. Tunah hian seeded pakhatna Czech hian world number 6 Tomas Berdych bakah Grand Slam champion tawh Radek Stepanek an nei avangin team khauh tak an ni.

Hetihlai hian India erawhin kum 1966, 1974 leh 1987 te khan Group playoff hi lo khel ve tawh mah se an la paltlang ngai lo. Kum 42-a upa Leander Paes chu India innghahna tur a ni leh ang.

Ram pahnihte hi vawi thum inhma­chhawn tawhin kum 1986, 1926 leh 1997 khan an lo inhmachhawn tawh a; Indian-in vawi khatmah hnehna a la chang ve lo. An intawn hnuhnung ber kum 1997 khan Pribram-ah an lo inkhel tawh a, India hi 3-2 in an chak lo. Hemi ṭum hian Leander Paes leh Mahesh Bhupathi te chuan double leh single match zawng zawng an khel vek.

Playoff khel turin Indian hian Group 1 Asia/Oceania zone second round-ah New Zealand chu kar hmasa khan Christchurch-ah 3 - 2 in an hneh.

An inkhelh tur chungchang zawhna chhangin India coach Zeeshan Ali chuan, "Davis Cup-ah chuan eng pawh a thleng thei. Czech hi team ṭha tak an ni tih chu ka hria, mahse kan ramah kan khelh dawn avangin kan dinhmun a chhe bik lo. Nikum khan Serbia lakah kan vanduai tawh a, kuminah erawh beiseina kan nei sang ve hle. World Group khel chin hi chu a ṭha zual 16 chauh an nih tawh avangin tel a awlsam lo hle," tiin a sawi.

Davis Cup chu

Kum 1900 aṭanga neih ṭan tawh tennis inelna hi International Tennis Federation (ITF)-in a buatsaih ṭhin a ni. Khawvel ram hrang hrangte inelna a ni a, mipa inelna a ni. Single match li leh double match khat hmanga inelna hi neih ṭhin niin kum tin neih a ni.

Davis Cup a hnuhma nei ṭha ber chu United States a ni a, vawi 32 zet an champion tawh. An hnuai chiahah hian Australia awmin vawi 28 an champion tawh bawk. Champion lai chu Switzerland an ni a, kuminah hian Great Britain, Australia, Argentina leh Belgium ten semifinal an inhlangkai tawh.

Mipa inelna tlukpui chiah hi hmei­chhe inelna Fed Cup a awm ve bawk a; khawvel ram hrang hrang zingah Australia, Czech Republic leh United States te chauh hi he inelna kum khata thleng kawp thei awmchhun an la ni.

Davis Cup-ah hian a thiam zual ram 16 'World Group' an tihte an inel ṭhin. Khawvel pum hi zone patum Americas, Asia/Oceania, and Europe/Africa-ah te ṭhen hran a ni a, kum tin ram 120-130 velin an khel ṭhin. Heng zone hrang hranga a sangte chuan World Group playoff an khel leh a; playoff paltang ramte chuan Davis Cup World Group an khel ta ṭhin a ni.

A sang ram 16-te chu knockout-in best of five match hmangin an inel ṭhin a, inelna hi a tlangpuiin Zirtawpni, Inrinni leh Pathianniah te neih ṭhin a ni. A ni hmasa berah hian single match hnih khelh a ni a, ni hnih niah double an khel a, ni hnuhnung berah chuan single match hnih an khel leh ṭhin.