United aṭangin Di Maria a chhuak dawn em?

Manchester United-in nimin zing khan San Jose Earthquakes 3-1 in an hneh a, manager Louis van Gaal-a'n inkhelh banah Angel di Maria hmalam hun a sawi.

Paris St Germain nena sawi zawm Argentine winger Di Maria chungchang sawiin Van Gaal chuan, "Ka sawi fo tawh angin Di Maria chungchang hi chu buaipui mek a ni a, a chian hunah chuan kan ṭawngchhuak mai ang. Tuna thuchiang awm chu July 25 hian min rawn zawm ang," tiin a sawi a, hemi chungchanga zawhna dang erawh a chhang duh lo.

United hian Di Maria hi British club-in a player a lakluhna manto ber ni turin nikum khan Real Madrid aṭangin pound maktaduai 59.7-in an la lut a, man tlawm takin chhuah an tum lo.

PSG hian Argentine winger lakluh an duh tih hi thudik niin a lang a, an ngamna zat hi pound maktaduai 40 bawr nia hriat a ni.

Kar liamta khan PSG assistant sporting director Olivier Letang leh United chief executive Ed Woodward te chu London-ah an inbia a, inremna an la nei thei lo.

Season hmasa khan Di Maria hian Premier League-ah vawi 20 chiah starting eleven a chang a, Van Gaal-a hnuaiah hmun pawimawh a chang pha lo.

Striker thar

Media lamin Van Gaal hi mipui barakhaih tur striker lakluh an tum angin an chhuah a, Dutch manager-in a sawi tum ziak loah media lam a puh.

United manager chuan, "Striker lei ka duh em tih ka chiang bik lo. Media lamah chuan mipui barakhaih thei tur striker ka lakluh tur thu an ziak, ka sawi tum nen a inang lo. Ka sawi tum chu thil dang daih a ni," tiin media lamin thudik chanve an ziah thu a sawi.

Manchester United hian Wayne Rooney chu mal tlat turin ring ngam mah se striker chu an la melh ve reng niin a lang. Tun hnaia United nena an sawi zawm langsar tak chu Juventus stiker Fernando Llorente a ni a, Bayern Munich forward Thomas Muller leh Barca winger Pedro hming an la ri ve reng bawk.

Keeper lam

Real Madrid nena sawi zawm David de Gea a la dam chiang lo. Van Gaal chuan, "Barcelona nen kan inkhelh hunah chuan a dam hman tawh ka ring. A bulah dam chiang lo chuan khel lui suh tih ka hrilh," tiin De Gea chungchang a sawi.

Manchester United hian US-ah keeper pathum an hruai a, tawnhriat nei lo Sam Johnstone-a'n match hnuhnung ber a khel tluan a, De Gea ang thoin second keeper Anders Lindegaard a inhliam.