MPL4 transfer hun a tawp

Nimin khan Mizoram Premier League club pariat tana tualchhung player inziahluhna hun thawh khatna chu a tawp.

MPL4 transfer thawhhnihna hi Round 7 leh Round 8 inkarah hawn a ni leh ang a, Mizoram pawna khel player-te tan erawh All India Football Federation kalphung zawmin August thla chhung inziah luhna hun hawn a ni.

Mizoram league sang ber club-te hian MPL khelh hmain July 30 aṭang khian knockout football tournament ngaihhlut Independence Day Celebration Football Tournament an khel ang.

Zo United-ah Tuaitea

TATA Football Academy chhuak PC Lalawmpuia'n MPL4 atana thawm nei lian bera chhal ngam Zo United FC a zawm.

Zo United FC hian Reitlang FC aṭanga hming thlak ringawt an duhtawk lo a, player 26 an ziah luh zingah Mohun Bagan-a Bhaichung Bhutia striking partner Tuaitea hming a tel.

Zo United FC manager Zosangliana chuan, "I Day Football-a kan result a zirin inter state transfer-ah mamawh lai thuam belh a ni ang," tiin season tharah result ṭhaah chiah an lungawi tur thu a sawi.

Aizawl FC an lungawi

MPL3 champion-in Mizoram Police aṭangin F. Lalrinpuia leh Lalbiahlua te an la lut a, Chanmari FC ṭangin H. Lalmuankima leh Lalruatthara an chhuhsak a, Dinthar aṭangin Ronaldo Zothanzama an la lut bawk.

Aizawl FC technical director Hmingthansanga chuan local transfer an hman danah an lungawi thu a sawi.

Hmingthana hian I League second division-a an player Alfred Kemah Jaryan nen contract an ziah tawh thu a sawi a, inter state transfer-ah pahnih vel an la lak theih thu an sawi bawk.

Aizawl FC hian MPL khel tura player 30 ziah luh theih turah player 25 an ziak lut tawh.

CFC-in Aizawl FC an rawk

Chanmari FC-in Aizawl FC lakah MPL title an chan a, MPL4 atan an elpui player pawimawh Lalrozama leh Reuben Zosangpuia te an chhuhsak.

CFC hian coach thar HC Zarzoliana enkawlna hnuaiah champion ngei an tum a, Dinthar FC player pawimawh R. Laldanmawia, Lalnunmawia leh Johny Lalfakzuala te an la lut bawk. Chanmari FC-in player 30 an ziak lut tawh a, MPL4 atan an inpeih tawh.

Discipline ṭha Police

Mizoram Police-in Aizawl FC lakah Valpuia leh Biaktea chan mah se talbuai an tum lo. Aizawl DFA first division club Upper Republic striker rinrawl Lalruatpuia chu Valpuia thlak turin an la lut. Player 25 an ziak lut a, a tam zawk hi inkhelh thiam vanga Police-a hna nghet nei an ni a, zam tur an ni lo.

Police manager B. Lalneihsanga chuan, "MPL club dang aiin inpuahchahna kan nei rei tawh zawk a, kan fitness pawh a ṭha. Kan squad erawh chhah lutuk chu a ni lo a, mahse club dang elpha tur chuan rilru leh ngaihtuahna hi a pawimawh ber chu a ni. Mizo fate zingah chuan ṭha tur chuang an awm bik hleinem," tiin a sawi.

Police coach Lalduhawma chuan Valpuia leh Biaktea te thlak an har tur thu a sawi a, amaherawhchu an tel lo tur hre saa inpuahchahna nei an nih avangin an result-in a tuar hranpa a rin loh thu a sawi ve bawk.

Kai thar Luangmual

MPL2 finalist Luangmual FC hi suspend vang chauha MPL3 khel lo an ni. MPL4-a club thar hi tualchhung football mi thar an ni lo.

Luangmual FC-in an player hriat chian sa an la lut a, Farkawn nen thawk hoin player 30 an ziak lut.

Luangmual manager Lalṭhazuala chuan, "Farkawn aṭangin pariat kan ziak lut a, panga hi chu ṭha tak an ni. Kan club hian Lalruatthara leh Lalruatdika te club dang awh turin kan enkawl seilian a, Farkawn panga tal hi chu club dangin an la inchuh ang. Pariat ka sawi zingah hian Farkawn tlangval Lianmawia (2013 Santosh Trophy Top Scorer) a la tel lo," tiin an chhiat bik loh thu a sawi.

BVT-ah Dingngheta

Transfer inhawn tirha thawm nei lian Bethlehem Venghtlang FC an zuih ral lo. MPL best player ni tawh MS Dawngliana bakah MPL-a tawnhriat nei ṭha Lalruatfela, PC Zosangliana, MS Dawngzela, Ramfangzaua leh R. Lalrinsanga te an lakluh hnuah Chanmari FC aṭangin an veng tlangval Laldingngheta leh Chanmari West aṭangin Lalrinchhana an la lut.

Supporter nei ṭha Bethlehem Vengthlang hian coach thar Lalsangzuala Hmar enkawlna hnuaiah team thar an din a, an khelh hmuh châkawm khawpin an ṭha. Chanmari West hian MPL4 khel turin player 26 an ziak lut.

Dinthar indin thar

Dinthar FC-in MPL3-a an player tam zawk an chhuah a, budget tlem zawkin team ṭha tak an la din tho. HPC Cup khelh zawh taka best player Lalhlimpuia bakah Lunglei FC rawlthar duhawm Isaac Lalruatpuia an la lut.

MPL3 champion-na kawnga Chanmari FC midfield innghahna Vanlalhuma chu west aṭangin an la lut a, NECS Cup leh CYMA Football-a Armed Veng champion puitu Lalnghinglova an la lut. Dinthar player chhuak tam mah se team enkawltu erawh tawnhriat nei ṭha T. Vanlalhluna leh Lalnuntuanga te an la ni a, dah hniam theih an ni lo.

Dinthar head coach T. Vanlalhluna chuan, "Season tharah chuan team ṭha zingah chhiar tel kan ni lo ang. Amaherawhhchu club zahawmna humhim turin theihtawp kan chhuah ang. Kan chem hmawr te hi hriam lutuk lo mah se a zum ve tho a, a chang hi chuan chem hriam lama sah ai chuan hriam lo lama inkhawn fawk hi a na zawk ve fo a nia," tiin an club dinhmun thiam takin Vanglaini palai a hrilh.

West an inpeih

Chanmari West-in tlarhnung thuam ṭhatna atana MPL2-a Luangmual FC final thlenpuitu Lalnunpuia leh MPL3-a Police defender Vanneihtluanga te an lakluh hnuah nikuma BVT keeper Liansangpuia leh Reitlang player pawimawh Lalzawmliana an ziak lut.

Chanmari West ṭhatna ber erawh an player neihsa an chelh thei hi a ni a, coach Chawngthansanga chuan khawtlang inlungrualna chu club ṭhatna ber a nih thu Vanglaini palai a hrilh.