First Division Open One Day Tourney Chhinga Veng an champion

Nimin khan First Division One Day Tournament 2020 final khelh a ni a, Chhinga Veng Cricket Club-in Chanmarians chu wicket 10-in an sawp.

Chhinga Veng hi Cricket Association of Mizoram (CAM) hnuaia inelna la kalpui mek Mapuia Cricket League, President's Cup, First Division, Second Division, Third Division leh First Division Open One Day Tourney-ah an champion vek a, record ropui tak a ni.

Ramhlun Sports Complex-ah final khelh a ni a, ṭhumvawra vannei Chhinga Vengin vawm hmasak an thlang. Chanmarians batsman-te'n Chhinga Veng captain Lalnuntluanga an ngam lo a, Ramhlun North tlangval hian wicket sarih lain run 14 chiah a pe a, tun inelnaah best bowler atan thlan a ni. Final-ah hian Sumit Lama nen chiah an vawm hman a, Sumit Lama hian wicket thum lain run 13 chiah a pe bawk.

Chanmarians tana run siam hnem ber R. Lalrinchhana'n run sarih chauh a siam a, team pumpui hian over 18-ah run 27 siamin an thi fai vek. Chhinga Veng opener pahnih Jonathan Lalrinchhana (14) leh Lalhriatpuia Khiangte (9) ten over 4.3 lekah run 29 siamin target an umpha.

Final-ah hian Chhinga Veng hian final-ah semifinal-a run 87 zet vaw chhuaktu K. Vanlalruata chu hliam tenau vangin an chhawr thei lo a, Durtlang tlangval hian match thum lekah run 116 siamin man of the series leh best batsman atan thlan a ni. Chhinga Veng player pahnih Ruata leh Sumit Lama bakah Chanmarians batsman Saidingliana ten Ranji Trophy khel turin vawiin hian Kolkata-a awm mek Mizoram team an zawm ang.