Champion Zarkawt inlan hun a thleng

Sharda University Mizoram Super League X chu nizan khan khelh ṭan a ni a, zaninah khelh chhunzawm a ni dawn - champion lai Zarkawt BCA chuan tlai dar 5:30-ah Chanmari Basketball Club hmachhawnin, zan dar 8:30-ah kaithar Saron BC leh Electric BC an inkhel bawk ang.

MSL-a vawi nga champion tawh BCA hi season hmasaa champion puitu Marc Lalthlamuana Sailo bawkin a enkawl leh dawn a, India international Lalrina Renthlei, MSL9-a Most Valuable Player Lalnunpuia Renthlei, Defensive Player of the League Matthew Remtluanga Sailo leh H. Lalhmachhuana te an kawl bawk.

A tawi zawnga sawi chuan, foreign leh state pawn player tel lo pawhin Zarkawt hi an ṭha tawk a, hmachhawn châkawm lo tak an ni - an ram pawn player Marquis Cunningham hi 6ft 10in a sang a ni a, China leh Belize thlenga champion nomawi lo chawi tawh a ni.

Mahse, Mizoram huap inelna langsar, football, cricket leh basketball thlenga club nei thei Chanmari veng boruak a lian leh dawn. Chanmari hian Mizo player zingah tawnhriat nei ṭha Michael Liansanga, Moses Zoremmawia, F. Zodinthara. Michael F. Lalawmpuia leh PB Vanlalmuana te ho an kawl a, an foreigner Gregoryshon Magee hian sulhnu a nei hraw hle.

American tlangval hi 6ft 11in-a sang a ni a, Jordanian league thlenga MVP lo ni tawh a ni. Uttar Pradesh tlangval, 6ft 5in-a sang Pulkit Sachdeva pawh hi ṭhatpui tham a ni a, UBA Pro Basketball League thleng tawnhriat nei tawhin, Indian Railways tan a khel ṭhin bawk.

MSL hi R. Dengṭhuama Multipurpose Hall, Mualpuiah khelh niin, a hmuna en duh tan, courtside ticket bik hi online-in triket.in-ah a lei theih a, a dang zawng erawh a hmunah lei tur a awm thung. Zonet chuan Rihnim leh YouTube lamah live-a en theih turin an pe chhuak bawk.