Last 16-ah Alcaraz a lut

Carlos Alcaraz chuan a vawi thum nan Indian Wells nomawi chawi ngei a tum a, kawng dik a zawh chhunzawm - nimin zing inkhelah Alcaraz hian Denis Shapovalov hnehin last 16 a invaw kai.

Court 1-a inkhelah Alcaraz hian a tir aṭangin inkhel a thunun a, set khatnaah phei chuan game hmasa panga a la thei hial; set hnih an khelh chhungin buaina tawk loin 6-2, 6-4 in a chak.

Indian Wells-ah hian vawi thum champion thei pahnih bak an la awm ngai lo, player tam zawk ten an tih theih loh chu Alcaraz hian tih theih a tum mek, quarterfinal thleng tur chuan Grigor Dimitrov a hneh leh a ngai dawn a ni.

Kum 21 mi Alcaraz chuan, "Match tir lama chet fuh hian nasa takin nghawng a nei thei tih ka hria a, chumi tur chuan a tir kan ṭan chiah khan ka bei nghal, hnehna ka chan theih nan nasa takin min pui chhunzawm bawk.

"Match hmabak hi a hautak dawn, ka khingpui tur Dimitrov hi player ṭha a ni tih ka hria a, inelna ṭha takin a hmang mek bawk, tihsual neih tlem a pawimawh dawn a ni," tiin a sawi.

Tun hmain Roger Federer leh Novak Djokovic te chuan Indian Wells nomawi hi vawi thum ve ve an lo chawi tawh a, tun ṭumah hian Alcaraz-a'n an a sulhnu zui theihna remchang a nei, kum 21 mi chauh a la nih avangin a champion theih chuan sulhnu ropui tak a ni ang.

Inkhel dangah Taylor Fritz pawh a chak, world number 4 Fritz hian Alejandro Tabilo chu 4-6, 6-3, 6-1 in a hneh. Set hmasa berah talbuaiin a service a hloh a, a tuar zui bawk - set hnuhnung pahnihah erawh player ṭha zawk a nihna chu a takin a lantir.

Indian Wells 2022 champion Fritz chuan, "Tihsual ka ngah em em mai kha ka insiamṭhat a ngai," a ti. Winners vawi 32 vaw chhuak mah se, a tihsual vanga a khingpuiin point a hmuh (unforced errors) chu 43 tehmeuh a tling a ni.

Francisco Cerundolo chuan Botic van de Zandschulp chu 6-3, 6-4 in a hneh a, a match lehpekah chuan Alex De Minaur a tum ang - Australian tlangval hian inkhel dangah Hubert Hurkacz 6-4, 6-0 in a hneh ve thung; Masters 1000 huangah vawi 50 a chak tlinna a ni chiah bawk.