West Ham hnehtu Newcastle

Newcastle United chuan Thawhṭanni zan khan West Ham United chu 1-0 in an hneh - goal awmchhun hi midfielder Bruno Guimaraes-a'n second half-a a khung a ni.

London Stadium-a inkhelah West Ham an hlauhawm hmasa, midfielder Tomas Soucek chuan hnai tak aṭangin goal bar chungah a thlawh chhuak, goal zawna kal ni se la chuan dan hman loh tur a ni.

Harvey Barnes-a khen pial zeuh chu Hammers goalkeeper Alphonse Areola chuan a lo dansak thung. Alphonse bawk hian Barnes-a tauh tho chu hnai takah a lo dansak bawk.

An inveng tawn a, goal kan hmu mai lo. Box pawn aṭanga Barnes-a cross chu a tirah lo pet chhuahsak mah se amah bawkin ball a chang leh a, a kanga cross lutin Guimaraes-a'n a lo tlawh lut a, khualmuala chak nan a tawk.

Newcastle United manager Eddie Howe chuan, "Kan tan chuan hnehna hlu tak a ni, ball kan chang tam lutuk lo a ni mai thei, mahse goal kan nawr dan leh keimahni lam kan inven thiam dan khan min tilawm hle.

"Ka hmuh dan chuan tun season chhunga match kan khelh ṭhat ber a ni hial ang. Player zawng zawng an khel ṭha vek, chutiang karah chuan Bruno khan fak a phu, hun pawimawh leh harsa karah a rawn ding chhuak thei tlat ṭhin," tiin a sawi.

Newcastle United hian Premier League match 28 an khelh aṭangin point 47 an hmu a, parukna niin an chunga awm Manchester City nen khelh zat inangah an point hmuh a inzat a, season thara Champions League khelh an inchuh na dawn hle.

EPL bakah League Cup final khelh tur an nei zui dawn - Pathianni zan dar 10:00 hian Magpies leh Liverpool ten League Cup final an khel dawn a, nomawi inchuhna an neih tur atan tun ṭuma an chak hi inbuatsaihna ṭha tak a ni ang.