Mohammedan leh Punjab inhnehtawk

I League champion Mohammedan SC chuan ISL-a an season hmasa bera an match hnuhnung ber chu point khat nen an khar a, Thawhlehni zan khan Punjab FC nen 2-2 in an inhnehtawk.

Kolkata khawpuia inkhelah Punjab lamin 2-0 in hma an hruai hman a, Ezequiel Vidal leh Luka Majcen ten goal khat ve ve an khung. Mahse, Mohammedan hian Marc Schmerböck leh Robi Hansda hmanga chhangletin, point khat an hlawh chhuak.

Mohammedan tan captain Zodingliana Tochhawng, Joe Zoherliana, Vanlalzuidika Chhakchhuak leh Lalrinfela Khiangte ten inkhel bul an ṭan a, Punjab-in Mizo player kawl an nei lo thung.

ISL-ah hian season hmasa aṭangin I League champion apiang an tel ve ṭan a, season hmasa khan Punjab chu I League champion ni chunga inhlangkai niin, table-a pariatna niin season an khar.

Tun season-ah I League aṭangin Mohammedan an kaisang ve leh a, Kolkata club hian match 24-ah vawi hnih chiah hnehna chang vein, table mawngphah luah chungin an season hmasa ber chu an mangṭha.

Nizan khan Bengaluru leh Mumbai City inkhelin, an result kan hre hman lo - Lallianzuala Chhangte captain-na hnuaia khel Mumbai hian point an hlawh chhuak lo a nih chuan playoff an khel phak lo ang a, Isak Vanlalruatfela khelhna Odisha an lut thung ang.

Zanin dar 7:30 hian Hyderabad FC chuan Kerala Blasters an mikhual dawn a, tun season ISL-a league match hnuhnung ber tur a ni tawh dawn a ni.