Champion tur a chiang lo - Verstappen

Formula 1 season hnuhnung paliah Max Verstappen a champion vek a, kuminah pawh rinkai ber a ni dawn. Mahse, Red Bull driver chuan champion tura chiangsa tumah an awm bik lo tih a sawi.

Bike intlansiakna sang ber season thar chu tun kar tawp hian an tlan ṭan tawh dawn, team hrang hrang chuan inbuatsaihna vawrtawp an nei tawh a, champion lai Verstappen pawhin a nomawi humhim ngei chu a tum.

Dutch tlangval Verstappen chuan, "Inbuatsaihna kan nei ṭha tawk, chutihrualin hmasawnna tur lai kan la ngah. Tlan chhin kan neih tawhte thlir chuan McLaren hi team ṭha an ni a, rinkai an ni tih pawh kan hria.

"A nihna tak sawi chuan Melbourne Park-a intlansiak kan neih turah hian tlan chak ber kan nih ka ring lo, tlan chhinna kan neih aṭangin siamṭhat ngai lai kan neihte kan hria a, chumi siamṭha tur chuan hun kan mamawh dawn.

"Chanchinbu lamah rinkai leh team ṭha anga min ziahna ka hmu ve fo a, an hmuh dan an sawi ni maiah ka ngai. Kei chuan rinkai bik kan awm ka hre lo, inang tlang vekin season bul kan ṭan dawn a ni," tiin a sawi.

Red Bull hian an car thar RB21 an hmang dawn a, eng ang taka ṭha leh chak nge a nih chu kan hre thuai dawn.

Pathianni chawhma dar 9:30 hian Melbourne Grand Prix Circuit-ah inelna an ṭan dawn a, team leh driver tinten a bul ṭan fuh nih an tum vek ang.