James tel loin Lakers an chak lo

LeBron James chu khel bawr hliam vangin a inkhel thei rih lo a, nimin zing khan Los Angeles Lakers tan a la inkhel thei rih lo - an thiampuipa tel lo hian Brooklyn Nets lakah 111-108 in an tlawm a ni.

Barclays Center-a inkhelah Luka Doncic chu minute 41 chhung a inlan a, a team thar tan hian point 22 bakah rebound 12 leh assist 12 neiin triple double chu a nei, mahse hnehna chan nan a tawk zo lo.

Nets player zingah mimal che ṭha fal tak sawi tur an awm lo, mahse player pang ngawtin point 10 chuang an nei thei a, an zavaia thawhhona chu a tawpah an chakpui ta zawk.

Lakers coach JJ Redick chuan, "Luka chungah hi chuan beiseina a sang ṭhin a, a sang chhunzawm zel bawk ang. A chunga mawhphurhnate a hlen chhuak ṭhin, duh ang thlapin thil thleng vek lo mah se lawmna tur zel a ni.

"James dinhmun kan ngaichang reng a, hmanhmawh taka chet a ngai kan ti lem lo," a ti. Regular season chauh ni loin playoff an khelh hun tur a thlir tel a, a player ṭha chu dam chiang tak lo chuan chhawr luih a tum lem lo a ni.

NBA regular season kal laiah Lakers hi vawi 40 chak tawhin Western Conference table-ah pathumna an ni mek a, ṭum 23 an tlawm tawh thung; Nets erawh Eastern Conference lamah 11-na an ni mek a, an tan playoff beisei san ngam a ni tawh lo.