FIFA buaina Eirukna do tur taskforce din tum a ni

Khawvel football chunga thuneitu FIFA chuan Thawhṭanni khan executive committee an nei a, FIFA chet dan leh siamṭhat hnathawhte a ṭhat tawk leh tawk loh thlithlai ṭhin tura member 11 awmna taskforce din an rel.

Blatter-a'n a sawi dan chuan mem­ber 11 zinga pakhat hi hotupa ber niin hmalakna tur a duang anga, team member dangte nen an ruahmanna ti hlawhtling tur hian an thawkho ang.

FIFA president Sepp Blatter chuan FIFA committee thuchhuak hi puangin FIFA inthlak danglamna tur an ruahmannaah chuan president nih theih hun chhung bithliah leh FIFA-a hotu lianzualte nihna zirchian a tel a ni.

June 2-a FIFA president aṭanga a ban thu puangtu Blatter a aiawh tur hi February 26, 2016-ah a thlanna neih a ni ang.

FIFA president thar?

October 26 thleng FIFA president chuh tur tan hming thehluh theih a ni a, hming langsar ber chu May thlaa Blatter hneh lotu Prince Ali bin al-Hussein leh UEFA president Michel Platini te an ni.

Platini bik hi khawmualpui hrang hranga football hruaitu UEFA (Europe), AFC (Asia), CONMEBOL (South America) leh CONCACAF (North & Central America) te chuan FIFA president hna hi chuh turin an ngen.

Kum 60-a upa Platini hian a chuh dawn leh dawn loh engmah thu a la tichhuak lo. FIFA executive committee neihzawhah French pachal hian, "Tunah chuan thil thar duhawm leh ṭha zawk rawn keng thei tur hruaitu nghakin kan awm thei ta," a ti a, a ṭawngkam aṭang hi chuan FIFA president chuh tum angin a lang lo.

Taskforce an duh lo

FIFA siamṭhat phuta din campaign group 'New FIFA now' tia hming invuah pawl chuan FIFA taskforce din hi an duh lo a, FIFA executive committee member-te hnenah an thutlukna chu ennawn tur leh reform commission din zawk turin ngenna an thlen.

New FIFA-te hian taskforce chu FIFA hnuaia awm tho tur a nih avangin huaisen taka ke an pen theih an ring lo a, FIFA nena inkaihhnawihna nei lo leh FIFA hnuaia awm lo tur commission din an rawt a ni.

North Korea 2026?

FIFA executive committee thu­chhuah puang tur hian Thawhṭanni khan news conference neih a ni a, British comedian Simon Brodkin a inlar.

Brodkin hi Blatter-a hmaah va dingchhuakin FIFA president hi US dollar note engemawzatin a vawm. Hetia Brodkin-a chet chhan hi eiruk thubuaia inhnamhnawih leh thamna sum tam tak la anga puh Blatter-a tih el nan a ni.

Lee Nelson tia hriat hlawh zawk Brodkin hian social media lamah, "North Korea-in 2026 World Cup an thlen theihna tura Sepp Blatter ka hmu thei hi ka lawm hle a ni," tiin World Cup thleng tur thlanna a sum inrawlh ṭhin anga an sawi chu FIFA tih el nan a hmang.

Brodkin hi a che danglam ṭhin hrim hrim. Kum 2013 khan Manchester City leh Everton ten Premier League match an khelh dawnin City player zingah a lo in 'warm up' ve ngawt tawh. Thla hmasa lawk khan Glastonbury festival-a Kanye West zai lai chu a lo tibuai tawh bawk. Kum 2014 World Cup puala England squad-ah tel a lo tum ve ngawt tawh bawk a ni.

Jeffrey Webb-a dinhmun

Thawhṭannia FIFA in executive committee an neih lai hian an vice-pre­sident hlui Jeffrey Webb erawh eiruk thu­buai vangin US court-ah a inlan ve thung.

Cayman Island lam chhuak Webb hi US Department of Justice-in eiruk thubuai a siamsak zingah a tel a, mar­keting rights chungchangah dollar maktaduai tel thamna sum laah puh a ni.

Webb hi New York Court chuan dollar maktaduai 10 hu pawisa dahkham tirin jail aṭangin a chhuah tir a, New York-ah house arrest a dah a ni.

CONCACAF president pawh lo ni tawh Webb hian pawisa fai aiah hian sana manto 11, car manto tak tak 2015 Ferrari, 2014 Range Rover leh 2003 Mercedes-Benz te a dah kham a, a nupui Dr Kendra Gamble-Webb hmingin dollar nuai li a dah kham tel bawk.