Newcastle United striker thar Mitrovic

Serbian striker Aleksandar Mitrovic chuan Anderlecht aṭangin pound maktaduai 13-in Newcastle United a zawm.

Kum 20-a upa Mitrovic hi Serbian club FK Partizan youth system chhuak a ni. Serbian striker hian kum 2011 khan Teleoptik tan professional career a ṭan a, kum khat a khelh hnuah a inzir chhuahna Partizan tan kum khat bawk khel lehin Belgian club Anderlecht a zawm.

Anderlecht tan hian Mitrovic hian match 90 khelhah goal 44 a khung a, ram tan vawi 13 khel tawhin goal khat a khung tawh bawk. Mitrovic hi Newcastle player manto palina a ni a; amah aia Newcastle player manto chu French midfielder Yohan Cabaye (£20m) bakah English forward ropui Michael Owen (£16m) leh Alan Shearer (£15m) te chiah an ni.

Mitrovic chuan, "Newcastle tana ka inziak lut thei hi ka lawm hle a ni. An stadium ka tlawh a, fan-te an rinawm zia ka hria a, pressure tam tur zia ka hre bawk. Amaherawhchu pressure hmachhawn hi ka duh a ni," tiin a sawi.

Newcastle manager thar Steve McClaren chuan, "Chuhtu tam tak kara Mitrovic kan la lut thei hi kan lawm hle a ni," tiin a sawi ve bawk.