Lowy zai a ni

Australia sumdawng hausa tawntaw; West­field Corporation, Scentre Group, Football Federation of Australia leh The Lowy Institute for International Policy chairman ni kawp Frank Lowy chu Europe-ah a thluak lam chian loh avangin zai a ni.

Kum 84-a upa FFA chairman hi May thla khan A-League grand final-ah Sydney FC hnehtu Melbourne coach Kevin Muscat hnena champion nomawi a hlan tur chu dawnsan aṭangin a tla a, a lu a sawh.

A tirah chuan na takin lang lo mah se kar hmasa khan Europe-a chawlh hmanga a kal chu a khua a sik avang leh a insawisel deuh avangin enkawl a ni a, a thluakah thisen a tling tih hmuhchhuah niin zai a ni ta a ni.

Football Federation Australia CEO David Gallop chuan, "Australia football hmingin Lowy hi ṭha chhuak leh vat turin duhsakna sang ber ka hlan e. Medical report-a a lan danin kan chairman hi an zai hlawhtling hle a, hun rei lo teah kan ramah a lo kir leh thuai dawn e," tiin a sawi.