Terry leh Cahill rawntu Mourinho

Chelsea boss Jose Mou­rinho chuan loan-a Radamel Falcao a lakluh hmain a defender pawimawh pahnih John Terry leh Gary Cahill a rawn thu a sawi.

Manchester United-a hlawhchham Falcao a lakluh avang hian Mourinho chet dan hi ṭhenkhat chuan mak an ti hle. Mahse, Portuguese manager chuan a defender rinrawl pahnih Terry leh Cahill-a ten Atletico Madrid striker hlui hian theihna tam tak a la nei tlata an hriat vanga la lut a nih thu a sawi a ni.

Mourinho chuan, "Kan ngaihdan chuan Falcao hi Europe a striker hlauhawm ber pawl a la ni reng a, box chhunga goal thun ngei tuma tal ṭhin mi a ni. Ka player te'n Premier League striker zinga ven hautak an tih ber pawl a ni a, a theihna leh thiamna te kha a la hlauh lo. Mahni inrintawkna leh a hlimna te kha a neihlet theih leh theih loh kan enchhin ang chu," tiin Colombian striker chuan a thiam a la theihnghilh loah a ngai.

'The Special One' chuan sawi chhunzawmin, "Kan club chhungkuaah hian Portuguese engemaw zat kan neih avangin a tlangnel thuai ang a, Atletico tana a khelhpui ṭhin Diego Costa leh Filipe Luis an awm bawk. Portuguese football hi ka en ngun hle ṭhin a, Porto-a a khelh lai khan player ṭha tak a ni. Atletico tana a khelh laiin Real Madrid ka enkawl a, ka hrechiang em em bawk. Nikuma Stamford Bridge-a Manchester United nen kan inkhel kha Falcao vang hian ka ennawn fo a ni," tiin Falcao chu a zirchian nasat thu a sawi.