Formula 1-ah car no 17 awm tawh dawn lo
Fremchman Marussia driver Jules Bianchi car khalh ṭhin car no 17 chu Formula 1 car number-ah hman theih a ni tawh dawn lo.
Nikum Japanese Grand Prix-a Suzuka tlankawngah a chet sual vanga thla kaw chhung zet nikhaw hre loa a awm hnuin Bianchi chu kar hmasa Inrinni khan Nice, France-ah a boral. Motorsport thuneitu sang Federation Internationale de l'Automobile (FIA) chuan he chhiatna hi pawi an ti hle a ni tih lantir nan car no 17 chu he inelnaah chuan hman tawh loh turin an ti ta a ni.
Thuchhuah siamin FIA chuan, "Formula 1 driver-te chuan anmahni car number tur an thlang a nih pawhin Bianchi number 17 hi chu tun aṭang chuan he inelnaah hian hman theih a ni tawh lo ang," tiin an driver boral ta number chu an dah ṭha tawh dawn a ni.
Ferrari young driver academy aṭanga inzir chhuak Formula 1 driver beiseiawm ber pawl Bianchi hian kum 2013 Australian Grand Prix-ah khan a professional bul ṭanin vawi 34 intlansiak a hmachhan hman. Kum 25-a upa Bianchi hi a in zirchhuahna Ferrari chuan Kimi Raikkonen thlakna tura an hual mek a ni nge nghe.
Ferreri president hlui Luca Di Montezemolo chuan, "Jules hi Ferrari chhungkaw zing ami ala ni reng a, kan hnena lo awm tawh ṭhin a nih bakah lo kir leh tura kan beisei lai a nih avangin min kalsan hi pawi kan ti hle," tiin a sawi ve bawk.
Kum 1994 khan San Marino Grand Prix-ah a chetsual avangin world champion vawi thum lo ni tawh Ayrton Senna chu Formula 1 intlansiaknaah a lo thi tawh. Ani hnuah chuan Bianchi hi he infiamnaa chetsual vanga thi leh hmasa ber niin nimin khan a nu leh pa te chenna hmun Sainte Reparate Cathedral, Nice-ah Bianchi hi vuiliam a ni.