India tan league pahnih neih a fuh lo - Constantine
India coach Stephen Constantine chuan Indian Super League-a football khelh chawlh tawh player-te inlan ṭha leh chu football hmasawnna a nih loh thu sawi a, kum khata player pakhatin coach pathum hnuaia an khel tur chu ṭha a tih loh thu a sawi bawk.
Kum 52-a upa Constantine chuan, "League pakhat neih a ṭul a ni. Season khata league pahnih awm hi chu a dik lo. Season ṭan tirh thla thum chhung chu coaching staff pakhat hnuaiah player-te'n ISL an khel ang a, a hnu lam thla ngaah coaching staff dang hnuaiah I League an khel leh a, player cheṭhate chu ka hnuaiah National camp an chhim leh ang. Khawvelah season khata coach pathum hnuaia insiamremthei hi an awm kher lo ang. India tan hei hi football hmasawnna a ni lo," tiin kum khata league pahnih awm chu ṭha lo a tih thu a sawi.
ISL hmasa berah khan Robert Pires leh Joan Capdevila ten football khelh an chawlhsan tawh nachungin FC Goa leh Northeast United tan an rawn khel leh a, kuminah football khelh chawlhsan tawh Roberto Carlos chuan Delhi Dynamos tan player leh manager hna a chelh kawp bawk.
English coach Constantine chuan, "Tunah chuan Major League Soccer (MLS) hi league hmasawn ber a ni. An player lak ho hi thlir ila, Steven Gerrard leh Frank Lampard te hi an ṭhat lai ber chu ni lo mah se kum rei tak ṭha taka la khel thei tur an ni. An player lakte hi hun rei tak chawlh tawh an ni lo," tiin ISL-a an foreigner lak dan chu sawisel.
Constantin-a'n ṭum hnih India a enkawlnaah match li a khel tawh a, vawi hnih chak loin; vawi khat an chak a, vawi khat an inhnehtawk. India hi 2018 World Cup qualifier-a Guam an hneh loh vangin an sawisel a, September 8 khian Bengaluru-ah Iran an mikhual leh ang.