Messi hi Pele ang maia thiam a ni - Belletti

Barcelona leh Chelsea tan pawha lo khel tawh defender Juliano Belletti chuan Lionel Messi chu Pele ang maia thiam a nih thu leh tunlaiah chuan ani aia ṭha an awm loh thu a sawi.

Kum 28-a upa Messi hian a vanglai hmang mekin season hmasa khan Barca chu treble champion a nihpui bakah an ram Argentina chu Copa America final a thlenpui bawk.

Barcelona thiampuipa Messi leh Belletti te hi Camp Nou-ah an lo khel dun tawh ṭhin a, La Liga leh Champions League nomawi an lo chawi dun tawh nghe nghe.

King of football tia hming lem an vuah sak Pele leh Messi chanchin sawiin kum 39-a upa Brazil defender ni ṭhin Belletti chuan, "Messi hi hmanlai Pele nen khan angkhat an ni. Hmanlai kha chuan Pele hi khawvela football thiam ber a ngaih a ni a, tunlaiah chuan Leo hi khawvela ṭha ber a ni thung," tiin a sawi.