Matic-a'n Arsenal keeper thar Cech a huphurh

Chelsea midfielder Nemanja Matic chan goalkeeper Petr Cech-a' Arsenal a pan chu a lawmpui rualin season tharah chuan che ṭha nghal lo se a tih thu a sawi.

Kum 33-a upa Cech hian season 11 zet Chelsea-a hmun a hman hnuin London club tho Gunners a zawm. An hmelma club a zawm chhan hi Jose Mourinho hnuaiah first choice a nih phak loh vang a nih bakah London-a chen chhunzawm zel a duh vang a ni.

Season hmasaa khan Premier League champion Chelsea leh Arsenal inthlauhna hi point 12 lai ni mah se Czech Republic international an lakluh avangin Arsenal-in point an hloh ṭhin tam tak chu an hloh loh phah ngei tura ngaih a ni.

Serbian international kum 26-a upa Matic chuan, "Petr-a'n club thar a zawm hi ka lawmpui a, a duhna hmun London-a a cheng chhunzawm thei tur hi ka lawmpui hle. Player ṭha leh ropui a nih avangin Gunners hi an vannei hle a, ka lawmpui rual hian che ṭha nghal lo se kan tan chuan a ṭha zawk ang. Amah hi point hmuh pui tham a nih avangin Stamford Bridge-a kum 11 hun alo hman tawh ang kha chuan hmang nghal lo se ka ti zawk," tiin Blues tana a khelhpui ṭhin chu a huphurh hle.

Chelsea defensive midfielder chuan sawi chhunzawmin , "Season hmasa khan Man United, Man City, Arsenal, Liverpool leh Tottenham te kha team hlauhawm tak an ni a, season tharah pawh hian an ṭha leh dawn. Kan lallukhum humhim tur chuan kan beih nasat a ngai hle ang," tiin a sawi.