Savic-a'n Atletico Madrid a pan

Atletico Madrid chuan Italian club Fiorentina aṭangin defender Stefan Savic chu kum nga chhung atan an la lut.

Manchester City defender hlui hian kum 2012 khan Fiorentina hi a pan a, Serie A club-ah hian a chet ṭhat avangin tun hnaiah AC Milan leh Manchester United te nen sawizawm a ni. Mahse, Montenegro defender hian a lo hlawhchham tawhna Premier League leh tawnhriat a lo ngah tawhna Serie A lama khelh chhunzawm ai chuan Spanish club pan hi a thlang ta zawk a ni.

Atletico sporting director Jose Luis Caminero chuan kum 24-a upa dfender an la lut thei hi a lawm zia sawiin, "Savic chungchanga Fiorentina nen kan inrem thei hi ka lawm hle a ni. Player che rang leh chak tak a ni a, kum naupang tak nichungin Serbia, England leh Italy-a league sang berah te tawnhriat a nei tawh a, kan ṭangkaipui ngei ang tih hi ka ring tlat a ni," a ti.