Kan vaia khelh ṭhat a pawimawh - Murray

Britain Andy Murray chuan ram hrang hrang 16 te inelna Davis Cup 2015 champion ni tur chuan mimal khelh ṭhat ai chuan team puma khelh ṭhat a pawimawh thu a sawi.

Pathianni khan Britain hian Queens Club-ah an mikhual France chu 3-1 a hnehin kum 34 hnuah Davis Cup semifinal an lut leh a; November thla khian Australia nen an inhmachhawn leh ang.

Britain number 1 Murray chuan, "Davis Cup hi mimal inelna ni loin ram leh ram hmanga inelna a nih avangin mimal chet ṭhat ai chuan kan zavaia kan chet ṭhat a pawimawh. Tumah pawimawh bik kan awm lo a, kan pawimawh dan a inang vek a ni," a ti.

Nikum Davis Cup thlir­letin kum 28-a upa Murray chuan, "Nikum aṭanga lang chiang tak pakhat chu hei hi a ni. Roger Federer hi khawvela player ṭha ber ni mah se tun hmain Davis Cup-ah ala champion ngai bik lo. Nikum khan an ram an chet ṭhat vangin a champion ve chauh a ni," tiin a sawi bawk.

Grand Slam vawi 17 zet champion tawh Federer-a te ram Switzerland hian nikum Davis Cup final-ah khan France chu 3-1 a hnehin an champion a ni.